US Open-a inlan tum kum 45 mi Venus
US Open-a inlan tum kum 45 mi Venus
Kum 2023 kha US Open singles main draw-a Venus Williams inlan tawpna ni tawhin, kumin tournament-ah hian wildcard entry a dawng a, vawi hnih a champion tawhna New York Grand Slam-ah tar hlei thei lo American mihang nula senior-in singles khelh leh a tum!
US Open organiser-te chuan he thu hi Nilaini khan puangin, thla 16 lai a chawlh hnuah Venus hian thla hmasa khan tournament a rawn khel chho leh a, Washington Open-ah Peyton Stearns hnehin, kha hnehna avang khan kum 2004 hnu lama WTA singles match hnehna chang thei upa ber a nih phah nghe nghe.
Seven-time Grand Slam winner Venus hian kumin US Open singles main draw first round-ah Belgian Greet Minnen a tum dawn a; a chipui Reilly Opelka nen inkawpin mixed doubles tournament a hmachhawn zui bawk ang.
Women’s singles wildcard hmu dangte zingah France star Caroline Garcia pawh telin, 2022 semi-finalist Garcia tan tun hi Flushing Meadows-a a inlan tawpna tur a nih taw hmel.
Kum 2022-a hmeichhe kum kharna WTA Finals winner Caroline Garcia hian kumin kumtir lam khan chawlh a tum thu hi a lo sawichhuak tawh a ni.