MATA hruaitute’n taekwondo hmunpui an lut Chawimawina an lo hlan!
India ram tana fehchhuak MATA senior vice president Master VL sawma (chief technical director) leh general secretary Master Joseph Thansanga chuan Seoul khawpuia World Taekwondo Headquarter, Kukkiwon tlawhin president nen inkawmna hun an hmang a; Korea ram taekwondo chawimawina sang National Assembly Award an tih chu Mizo Master pahnihte hnenah hian an lo hlan hial a ni!
MATA hruaitute hian taekwondo hmasawnna tura an hmalak dante sawiin, Mizoram sawrkarin Vision Olympic 2036 an neih thu leh taekwondo atanga Olympian beiseina an neih berte zinga mi a nih thu taekwondo hotu lawk ber berte hi an hrilh bakah Mizo puanchei leh MATA souvenir an hlan nghal bawk.
Kukkiwon president chuan Mizoram Taekwondo hmalakna leh Mizoram sawrkar tumnate chu fakin, Master pahnihte hnenah hian India leh Mizoram tana an hnathawh that hriatpuina leh fakna ‘ziakthuchei’ (award) a hlan nghal bawk a ni.
Mizo fehchhuak pahnihte hian Mizoram sports minister Lalnghinglova Hmarin Mizoram Sawrkar aiawha ‘Taekwondo Ambassador for Mizoram’ nihna a pekna lehkha chu Grand Master Prof. Hee Do Kim, Director of Research Institute Kukkiwon leh Grand Master Lee Jay Ku, vice president World Taekwondo Missonary Association-te hnenah an hlan nghal.
Taekwondo tana an hnathawh that hriatpuina, Korea rama taekwondo chawimawina sang ‘ziakthuchei’ chu Woo Won Shik – Speaker of the National Assembly (Parliament) of South Korea (22nd National Assembly) & Honorary Chairman of member of the South Korea National Assembly Taekwondo Federation hnen atangin Master Joseph Thansanga leh Master VL Sawmate hian an dawng bawk a ni.
Khawvel ram 209, mihring maktaduai 80 chuang inthlunzawmna World Taekwondo Headquarter, Kukkiwon tlawhnaah hian Grand Master Prof. Hee Do Kim leh Grand Master Lee Jay Ku-te bakah Kukkiwon Technical Director-te’n an tawiawm a ni.