Ram kang vanga buai Spain-ah mi pali thi tawh

On Aug 20, 2025 8 0

Ram kang vanga buai Spain-ah mi pali thi tawh
Spain-a ram kang avanga thi chu mi pali an tling ta a, kang thelh hna thawhpui turin sipai 500 dang tirh belh leh niin 1,900 tirh an ni tawh.
Pathianni khan tlang awiha truck tlan liamah kang thelhtu pakhat a thi leh tih Castile & León region sorkar chuan a sawi.
Prime Minister Pedro Sanchez-a chuan thihna a thleng leh chu ‘a lungchhiatthlak tak zet’ tih X-ah a tar lang.
An thenawm, Portugal-ah pawh Pathianni vek khan lirthei chetsualnaah kang thelhtu a thi tih President Marcelo Rebelo de Sousa chuan a sawi bawk.
Greece, France, Turkey leh Balkan-ah pawh ram a kang a, Europe chhim lam chu khaw lum takin a tuam mek bawk.
Spain-ah hian hmarthlang leh khawthlang hmun eng emaw zatah ram a la kang a, mi 27,000 chuangin an in an chhuahsan mek.
Castile & León hi a tuar na ber niin tual chhunga Radio 5 station chuan Thawhtanni khan meikhu nasa avangin boruak chu ‘hip theih loh’ tiin a puang.
Khawthlang lama Cáceres province-a ram kang chu thunun theih a la ni lo va, hectare 11,000-a zau a kang tawh.
Hmarthlanga Galicia region-ah hmun 12-ah a kang mek a, a tam ber hi Ourense province-ah niin hectare 17,500-a zau a kang tawh.
Pathianni khan Castile & León-ah hian mi pangain hliam an tuar bawk a, an zinga pali chu an dinhmun a tha lo hle nghe nghe.
Kar hmasa khan kang thelh tura inpe pahnih chu Leon-ah an thi a. Madrid bula Tres Cantos-ah mi pakhat a thi bawk.
Kuminah hian Spain-ah hian hectare 3,43,000 chuanga zau ram a kang tawh niin European Forest Fire Information System (EFFIS) chuan a chhinchhiah a, nikuma kang let thuak a ni tawh.
Kartawpah khan Civil Guard chuan Galicia region-a A Coruña-ah ram an tihkan avangin mi pali hremna pek an ni tih an sawi a. Spain-ah hian tihpalh pawh ni se ram tihkan hi dan bawhchhiatna a ni.
Portugal pawh July thla tawp atang khan ram kangin tibuaiin an ram hmar leh laili chu a tuar na an ni.
Kuminah hian Portugal-ah hian ram hectare 2,16,000 chuanga zau akang tawh tih EFFIS chuan a sawi.
Spain leh Portugal hian European Civil Protection Mechanism tinungin hemi hnuaiah hian ram dang puihna an dil thei.
Spain pui tur hian ram dang atangin kang thelhtu an lut nual tawh a, Portugal nen kang thelh thlawhna pahnih ve ve an dawng tawh bawk.
Europe chhim lamah hian nipuia ram kang hi a awm deuh ziah a, kuminah hian khaw lum lutukin a tizual.