Nigeria-a bandit-ten mosque an beihnaah mi 17 vel that

Silai kengten Nigeria hmarthlanga mosque an luhchilhnaah inkhawma lo awm mek Muslim thahnem tak an that a, tual chhung sorkar chuan ‘phuba lakna avanga bei’ niin an sawi.
Katsina state-a police chuan mi 17 an thi niin an sawi a, a beitute hi heng lai vela bandit tia an sawite an ni a. Thi zat hi sawi dan thenkhatah chuan hei aia tam hi a ni.
Unguwan Mantau khuaa mosque hi Thawhlehni khan luhchilh a ni a, a hma ni hnihah khan tual chhung miten bandit-te lambunin eng emaw zat an thah a, hemi phuba hi an la niin Katsina state hotu lian, Nasir Muazu chuan a sawi.
Nigeria hmarthlangah hian bandit hi an tam hle a, silai kengin sum siam nan tual chhung mi an bei nasa hle.
Katsina state-a Commissioner for Internal Security Muazu chuan tun tuma beihna hi zing tawngtai lai niin a beitute hian tum bik pawh nei lovin an pawng kah chiam niin a sawi.
Nilaini chawhnu thleng khan a beitute hi hlauhawm takin an la che a, Muazu-a chuan police leh sipaite tirh niin zawn chhuah tuma beih mek a ni tih a sawi.
Phuba lakna na tak tawng mah se Muazu-a chuan tual chhung sorkar chuan vantlangin an himna atana hma an lakna chu an thlawp a, an pui zel dawn tih a sawi.
Unguwan Mantau khuaa chengte chuan lu an sun a, hliamte an enkawl a. An tih dan thinah chuan thi chhungte hi an in kawtah an thu a, miin hnem nana thil an pekte an dawng thin.
Nigeria-a hmarthlang lam hmun zau tak, Niger nena an inrina bawr hi mi sual pawl tamna niin pawlte hi an inbei fo va, ram pahnih hi an kartawn reng a, pawi an khawih lohna lam ramah an bik bo zel thin avangin man mai pawh an harsa thin.
Katsina leh an thenawm, Zamfara state hi bandit-te chetna tuar na ber niin nunna tam tak chân a nih bakah tharum thawhna tlanchhiatsana pem an tam phah hle.
Ni rei vak lo liam taah pawh khan Zamfara-ah mi ru botuten mi ruk 35 vel an that a, tlanna sum an phut dawng vek siin an that tho niin tual chhung thuneitu pakhat chuan a sawi.