Kum 10 tling Zothan Autoworks hma sawn zel tum

Kum 10 tling Zothan Autoworks hma sawn zel tum
Tata Motors commercial vehicle dealer Zothan Autoworks chuan kum 10 a tling ve ta a, sawiselna leh fakna karah Mizo mipui tan hmasawn zel an tum tih an sawi.
2015 August 25 khan Zothan Autoworks hi hawngin, hemi kum September 9 atangin Mizoramah lirthei an hralh chhuak a; kum 10 tlin meuh chuan 7019 an hralh hman.
Managing director Zothantluanga chuan, Pathian hruaina avanga kum 10 tling thei an ni, tiin lawmthu a sawi a. Anmahni dawrtu leh puitute chungah lawmthu sawiin, an hnuaia thawktute thawhrimna leh inpekna vang a ni, a ti.
A tirah hnathawk mi 40 awmin tunah chuan 115 an chhawr mek a, chawhrualin thla tin sumdawnna lirthei 58 chuang hret hralh ziah ang an ni. February 2021 kha thla khat chhunga lirthei an hralh tam ber niin Vahan-in a chhinchhiah danin 186 an hralh chhuak.
Bawngkawnah Sale office neiin Phunchawngah Service Station an kalpui a; Lunglei, Lawngtlai, Siaha, Champhai leh Kolasibah branch hawng tawhin Tata OK a hranin an nei tel bawk.
Lirthei an hralh tawh zingah cheng nuai 5.60 man Ace Gold (petrol) a tlawm ber a, cheng nuai 70.45 chuang man Signa 4830 a to ber ve thung.
Kum 10 tlin lawmna atan anmahni dawrtute zinga mi vannei 10 thlang chhuakin August 25 atanga thla ruk chhungin vawi khat a thlawnin lirthei an siamsak dawn a, Rs 50000 man thleng a huam ang.
General manager Remruatfela chuan, service lamah hna a hautak avangin sawisel an tawk fo a, Tata Motors dan hnuaiah anmahni hralh chauh ni lovin Mizorama Tata commercial vehicle chhia a awm a nih chuan khawi hmunah pawh an siamsak a ngai a, an indaih tawk lo thin tih a sawi a ni.
“Thla tin Mizorama contractor-te lirthei hman ringawt pawh 300 atanga 400 vel kan veng tel a, chuti chungin theihawp kan chhuaha tunhnaiah hma kan sawn niin kan hria. Sawiselna kan dawngsawng thei reng a, inpan chilha hmaichhana intanpui theih a nih phei chuan kan inhawng reng a ni,” a ti.
Zothan Autoworks-in Mizo thalaite dawmkanna atan kawng hrang hrangin hma a la tel a, a bikin infiamna lamah a neitute an inhawng tih general manager hian a sawi.
Kum 10 chhungin Mizorama sports event hriat hlawh LPS Pro Fight-ah title sponsor vawi li (2016, 2019, 2022, 2023) leh Pro Volleyball-ah title sponsor vawi thum (2016, 2022, 2023) an ni tawh a ni.