Assembly-in dan siam tur pahnih pawm

Ni hnih awh tur Mizoram Legislative Assembly 9-na thutkhawm vawi 5-na chu Nilaini khan tan a ni a. Sawrkarin dan thar a siamna tur bill pahnih pawm a nih bakah Forest dan thar hmanna tur dan awmsa hman ve tur chu pawm a ni.
Assembly speaker Lalbiakzama kaihhruaiin Session neih hnuhnung ber leh tun thutkhawm inkara Parliament/ State Legislative member thi sun an ni a. Sunte hi Rajya Sabha MP hlui Ronald Sapa Tlau leh Dampa bialtu MLA a nih laia chatuan ram pan Lalrintluanga Sailo an ni a. An chanchin chhiarchhuah a nih hnu ah member-ten an uina thu an sawi a. Sunna hun hman zui a ni.
House-ah report leh paper hrang hrang pharh a ni a. Forest minister Lalthansanga’n official resolution pulutin sawiho a nih hnuah pawm a ni. Social Welfare minister Lalrinpuiin ‘The Mizoram Prohibition of Beggary Bill 2025 a putluh leh Land Revenue & Settlement minister B Lalchhanzova’n The Mizoram (Land Revenue) (Amendment) Bill 2025 a putluh chu pawm a ni. House-a zawhna chhan chi pakhat lak hman a ni a, speaker Lalbiakzama hian a tul hun atana a thutna luah tur, panel of chairman a puang bawk.