United an buai, an hniam zual zel

Pathianni zan khan English Premier League 2026-27 khelh chhunzawm a ni a. Season hmang chhe tak Manchester United chu Old Trafford-ah ngei an mikhual AFC Bounemouth hneh lovin an mualpho. Bournemouth lakah 3-0 ngawta tlawm United an hniam zual zel a, 16-naah tlahniamin table mawngphaha awm Sunderland nen point hnih chiahin an inthlau. United an tlawm laiin an hmelma lian Liverpool in hnehna an chang ve thung.
United an buai zual
English club lian Manchester United hian EPL 2026-27-ah bul an Tan chhe hle a, AFC Bournemouth an mikhual hma thleng hian vawi 7 khelin point 7 chauh an la hmu. An mualah chak se hmasawn hret thei tur an nih laiin chiang takin an tlawm zui leh ta bawk si a, buai zual zelin an hniam deuh deuh zel. An chetchhiat zawn em vangin manager Michael Carrick ban hun a hnaih deuh deuh zel thung.
United manager Carrick chuan Como lakah an tlawm Tuma a tactic sawiseltu Bruno Fernandes chu bul a Tan tir lova, chawlhlawk hmain si hnih phur bawk mah se Fernandes hi a chhawr lo tluan. An captain tel lova inlan United hian chak ngei tumin Tan khawh bawk mahse an mualah beisei an phak lo. Game mumal tak khel chhuak hleithei lo United lakah Bournemouth in goal an thun hmasa. Justin Kluivert freekick Tha tak chu Rayan chuan near post-ah chiang zetin a thawlh lut a, minute 38-naah hmahruaina goal a thun.
Goal thun hmasa zawkah an Tan vangin Bournemouth an phur a, inrintawkna sang zawk nen Old Trafford-ah an inlan chhunzawm. Goal thun belh ngei tumin an khingpuite an nawr chhunzawm a, goal an thun belh leh thuai. United defender Leny Yoro chetsual vangin Adrien Truffert chuan ball a chang. Truffert hian Marcus Tavernier tan Tha zetin a chhawp zui a, Tavenier hian minute 43-naah awlsam taka pet goal in an hmahruaina a tizau.
Si hnih phur chunga chawlhlawk hmangin United in insiamThat tum viau mah se an hlawhtling zo lova, chawlhlawk hnu lamah goal an chhuah belh leh. Goal thun mamawh United hian hlauhawm siam zauh mahse an chhawr Tangkai zo lo. United tlarhnung leh singhak chet fuh tawk loh vangin hun Tha an nei zui leh a, Evanilson chuan minute 71-naah pui zeta pet goal in an goal thumna a thun. United in an si phurh sut tum viau mahse an hlawhtling zo lova. an mualah ngei 3-0 a tlawmin an mualpho nawn leh
United lakah an chak vangin Bournemouth in hma an sawn hret a, khelh 8 aTanga point 9 hmuin 13-naah an inhlangkai. An mahni ang thova season hmang Tha lo Bournemouth lakah chiang taka tlawm United hian khelh 8 aTangin point 7 chauh an la hmu a, 13-na aTangin 16-naah an tlahniam ve thung. Table hnuai ber luahtu Sunderland nen United hi point hnih chauhin an inthlau a, an dinhmun a Tha lo hle. United hian kum 1986-87 hnu lamah bul an Tan chhiat ber Tum an tawng mek. InsiamTha a, hma lam pan turin an manager Michael Carrick an ban thuai tura ngaih a ni.
Reds an chak
An mualah ngei Red Devils an chak zawh loh laiin Reds (Liverpool) erawh chuan Anfield-a an mikhual, season kal meka khel Tha tluang tak Brighton & Hove Albion chu 2-0 in an lo hneh a, point thum hlu tak an hmu.
Liverpool hian an mikhual Brighton lakah bul an Tan Tha a, inkhel Tan aTanga minute 12 chhung lekin goal hnih an thun hman. EPL 2026-27-ah bul Tan Tha, Liverpool lakah an tlawm chung pawha top 3 hiang la luah phak Brighton hian vanduaina nen Anfield-ah bul an Tan. Brighton player Pascal Gross chuan minute 17-na lekah an lamah a ti-goal palh a, Liverpool hmahruaina goal a thunsak.
An mualah hmahruaitu an nih vangin an phur a, Liverpool hi Tha zual zawkin an inlan. Reds tan hian minute 21-naah Alexander Isak chuan an goal hnihna a thun a, an hmahruaina a tizau. Minute 4 chhung leka an goal hnih thawhchhuah hi Reds hian an chakpui a, Brighton lakah point thum hlu tak an hmu.
Brighton hnehtu Liverpool hian khelh 8 aTanga point 15 hmuin hma lam an pan a, an hneh tak Brighton hi point khatin an la umphak lova, palinaah an awm mek. Liverpool lakah tlawm bawk mah se khelh 8 aTanga point 16 hmuin Brighton in pathumna an luah chhunzawm a, an chungah point 21 ve ve hmuin Arsenal leh Manchester City te an awm.