Assembly zawhna chhan hman loh tam

August ni 27-ah Assembly Session an tan a, zawhna chhan hman loh a tam thu sawi chhuah niin, a tan ni-ah hemi chungchang hi titi a tling nghal. Social media lamah pawh a darh nasa.
Zawhna leh chhanna hun an tan dawnin speaker Lalbiakzama’n zawhna chhan hman loh a awm thu a sawi a, session hmasa lamah pawh hemi chungchang a lo sawi tawh thu sawiin, “Assembly question chungchangah hian tan i la thar teh ang u tiin ngenna ka lo siam tawh a,” a sawi a, chu chu member pahnihin an chhunzawm a ni.
Eptu lam leader Lalchhandama Ralte a lo ding nghal a, Nilaini-a session-a hun an hman dan tur (list of business) pawh a hma zanah an la dawn loh thu leh mak a tih thu a sawi.
“Nizanah vawiina kan rel tur list of business pawh, zan dar 12-ah pawh ka la hmu thei lo a ni. He house a tibawrhbang hlein ka hria a,” a ti.
Zawhna chhan hman loh chungchangah tu department nge muang tih pawh sawi a tha tiin a sawi a, house leader-in zilhhau se a thu leh, speaker pawhin lo bawhzui se a duh thu te a sawi.
Lawngtlai West bialtu C Ngunlianchunga a rawn ding ve leh a, zawhna chhan hman loh a tam chu pawi a tih thu sawiin, sorkar chu inthlahdahah a puh.
Ni 15 hmain zawhna thehluh tur a ni a, member-te’n ni 15 hmain zawhna an thehlut thin tih a sawi a, chuti chunga department-in an chhang hman lo chu a sawisel. He sorkar hi a inthlahdah tlat a ni, a ti.
“Official-te’n a pawimawhzia an hrethiam tlang turah ngai ang aw,” tiin speaker-in a tlang a kawm a ni.