Mi sang telin Mexico-ah bo tam lutuk duh lohna lantir
Mi sang telin Mexico-ah bo tam lutuk duh lohna lantir
Mi tam tak an bo thin duh lohna leh na zawka mi dah botute laka thuneituten an chet chhuah phutin Mexico-ah mi sang tel an pung khawm.
Mexico City, Guadalajara, Córdoba leh an khawpui lian dangah chin hriat loh chhungte leh an thiante bakah mihring dikna chanvo humhalhtuten kawng an zawh a. President Claudia Sheinbaum-i sorkar chu an duh laite hmuh chhuaha an awm theih nan leh ru botute laka na zawka chet an phutna an lantir.
Mexico-ah hian 1,30,000 vel an bo mek a, heng zinga a tam ber hi kum 2007 atangin, President Felipe Calderón-a’n ‘ruihhlo do’ a puan hnu atangin a ni.
Bo tam tak hi tih luihnain ruihhlova sumdawng pawl, (drug cartel)-ah teltir an ni a, a duh lo chua thah an ni hlawm bawk.
Drug cartel leh a huhova pawi khawih thin pawl dangte hi mi an bonaa mawhphurtu ber an nih rualin venhim hna thawktute pawh thihna leh mi bo leh thinah hian dem an kai bawk.
Mexico-a chin hriat lohva bo an tam em avang hian khawpui lian, state leh khawtlang tih deuhthawhah a tuartu chhungkua an awm.
Inrinnia (India rama Pathianni zing atangin) lungawi lohna lantirna hi chhim lama Oaxaca state atanga hmar lama Sonora leh Durango thlenga lantir niin dikna humhalhtu pawla tel leh bo chhungte an thawk chhuak a, placard kengin thuneitute chu an harsatna chin felpuia nasa zawka che turin an duh tih an tar lang hlawm.
Mexico City-ah chuan pung khawmten kawng an zawh hian lirthei chevel pawh a tibuai nasa hle a, kawngpui lun berah kawng an zawh.
Ruk bo chhungte tam tak chuan a zawngtu pawl, ‘buscadores’ an tih an din a, heng mite hian hnu an chhuinaah dai hnai leh hmar lama thlaler vel an dap thin a. A ruala mi phumna hmunte pawh an hai chhuak nual tawh.
Buscadores pawh hi an dinhmun a him lo hle a. Tun hnaiah pawh Jalisco state-a narco-ranch an hai chhuaha inkahna thlengah pawh an zinga mi tam tak an thi a ni.
A hnuah State Attorney General pisa chuan he hmunah hian inphumna hmun engmah a awm lo niin a sawi nghe nghe.
Mexico hi mi bo tamna ram niin Latin America pumah bozat pawh a khum hial a. Guatemala-a kum 36 chhung tual chhung indona, kum 1996-a tawp taah khan mi 40,000 vel an bo va. Kum 1976 leh 1983 inkara Argentina-a sipai rorelna a awm lai khan mi 30,000 vel an bo bawk.