Aizawl leh Churachandpur helicopter service tir dawn

Aizawl leh Churachandpur helicopter service tir dawn
Aizawl leh Tuithaphai Manipur inkarah helicopter service tir tum a ni tih chief minister Lalduhoma chuan a sawi.
Hmar Students’ Association (HSA) Gen. Hqrs hruaitute chuan Thawhlehni khan chief minister an hmu a. Kumin December 3-5 chhunga Saipum Mizoram-a general assembly leh Sikpui Ruoi an hman turah khuallianah an sawm a. Chief minister hian harsatna dang a awm loh chuan a lo ngaihtuah tur thu a hrilh.
Inkalpawhna tih hmasawna atan leh Zofate impukhatna tura hmalakna kalzelah Mizoram sawrkarin Aizawl leh Tuithaphai (Churachandpur) Manipur inkarah helicopter service tir an tum a, Churachandpur-ah Mizoram House sak thuai an tum tih a lo hrilh a ni.
Mizoram sawrkarin Mizoram leh Tipaimuk inkalpawhna NH-2 (NH 54 thin) a Tuivai Bailey bridge (Unity Bridge) a dawh sak vangin HSA hruaitute hian lawmthu an sawi a. Mizoram hmar lam inkalpawhna kawng, a bikin Serkhan -Bhaga road-a Saipum- North Hlimen inkar leh Tuirial -Mauchar inkar kawng siamthat, khaw thenkhatah tui supply tha zawk a awm theinan leh hmasawnna hna chak zawka a kal theihnan a hma laksak turin chief minister hi an ngen.
HSA hruaitute hian September 8 khan Assembly speaker Lalbiakzama, minister Lalnghinglova Hmar leh MLA Robert Romawia Royte an hmu a. General assembly leh Sikpui Ruoi hmanpui turin an sawm bakah thil pawimawh chi hrang hrang an sawipui a ni.
HSA Gen. Hqrs hian September 6 khan Aizawl-ah 32nd Executive Council an nei a, ram leh hnam hmasawnna leh zirlaite hmasawnna tur thil chi hrang hrang an rel.
Chief minister hmuhnaah hian HSA hruaitute hi HSA Assembly speaker L Rothanglien Khawbung in a hoa, adviser to chief minister (Political) Lalmuanpuia Punte, MLA leh Mizorama HSA hruaitu thenkhatin an tawiawm a ni.