Khawthlang lam eng pekna tur tih changtlun hna peihfel hnai

Khawthlang lam eng pekna tur
tih changtlun hna peihfel hnai
Power & Electricity minister F Rodingliana chuan Nilaini khan Mizoram khawthlang lam kawlphetha lakluh leh pekchhawnna tih changtlunna tur, North Eastern Region Power System Improvement Project (NERPSIP) hnuaia hnathawh mek 132/33kV Sub-Station West Phaileng ami leh 132/33kV Sub-Station Marpara ami a tlawh a, hawn thuai a nih theihnana hmabak la awmte a enpui.
Minister hian Phaileng Sub-Station-a hnathawktu Powergrid nen inkawmin hmalakna hrang hrang a thlirlet pui a. Mizoram khawthlang lamin power supply hnianghnar zawka an neih theihnan heng sub-station siam zawh thuai dan tur leh Mizoram sawrkar kuta hlan thuai dan tur sawipuiin, Mizoram sawrkara hlan a nih hun tur a re lpui. Mizoram-in he 132 kV Sub-Station hi tangkai leh hlawk zawka hman theih dan tur leh harsatna awm sutkian dan tur a ruahman pui bawk.
132/33kV Marpara Sub-Station leh 132/33kV West Phaileng Sub-Station sak hna hi September 2018 khan bul tan a ni a, mimal compensation leh forest clearance lama harsatna awm avangin a huna zawh theih lohin rei tak a awm a; tunhnaiah Mizoram sawrkar hmalakna in forest clearance atan cheng nuai 189.71 chu Forest department-ah pe in, hnathawh chhunzawm leh theih a ni ta a ni.
Tunah hian sub-station sak hna leh transmission line thlun hna zawh tawh niin, 33kV level-a test charge tawh a ni a, 132kV level-a test charge leh tur hian Regional Load Dispatch Centre-ah first time charging phalna nghah mek a ni.
West Phaileng Sub-Station bikah hian side drain leh RCC kawng bakah transit camp siam hna tih loh chu thawh zawh vek tawh a ni a, heng la zawh loh pawh hi tun thla – September chhung hian zawhfel beisei a ni.
Marpara Sub-Station ah hian switchyard panna kawng siam hna, side drain, transit camp building, security haat bakah gate siam hna thawh mek a ni a, March 2026-a zawhfel beisei a ni.