Kawng la tha lo mah se ni tin mamawh thil a awm

Mizoramin ni tin mamawh thil a lakluhna kawng a chhiat avangin kuminah mipuiin harsatna an tawk nasa a, kawng hi la tha lo mah se ni tin mamawh thilah harsatna a awm rih lo.
Sairang leh Khamrang inkar kawng a la tha tak tak lo a, lirthei khalhtute’n harsatna an la tawk reng. Mahse kawng hi a zia deuh a, bungrua pawh an phur thleng thei rih.
July thlaah Mizoram, a bikin Aizawlah ni tin mamawh thil a thleng meuh lo a, mipui a nghawng hle. August thlaah pawh he harsatna hi a la awm a, mahse a zia deuh deuh. Tun hnaiah tak chuan he harsatna hi a reh tawh tiin a sawi theih ang.
Kawng chhiat vanga thil thleng lo langsar bawnghnute (amul gold) pawh a thleng pangngai tawh a, dawrkaite chuan kar hmasa atang kha chuan agent hnenah duh zat zat a lak theih tawh tih an sawi. July leh August velah chuan bawnghnute hi a thlen chang pawhin a zuar duhte an intlar thin a, tun thlaah chuan chutiang chu a ngai tawh lo an ti.
Tel pawh a thleng tha an ti a, eitur thil chi hrang hrang pawh a zuar chhawng duhte tan duh zat zat a lak theih an ti. In sakna bungrua pawh a thleng a, ni tin mamawh thil hrang hrang a thleng pangngai tawh tih an sawi.
Mizoram Truck Drivers Association (MTDA) hruaitute chuan kawng hi a zia deuh rih a, mahse a la tha lo a, lirthei khalhtute’n harsatna an la tawk reng tih an sawi.
August ni 2 atanga ni 7 thleng khan Sairang leh Khamrang inkar kawng siam a nih avangin lirthei an tlan lo a, ni 7 zan atangin tlantir an ni. Chumi hnuah lirthei an tlan zui zel a, mahse MTDA hruaitute chuan kawng hi a chhiat leh viau tawh thu, siam nghal thin bawk mah se khuar leh titoh a tam thu an sawi.
September ni 7, Chawlhni pawh khan truck pakhat a tlu a, tluk hlauhawm khawp ni lova ngaih ni mah se vanduai chuan tluk theih a ni a, ruah a sur deuh chuan tluk hlauhawm khawp ni leh mai thei a ni tih te an sawi bawk.
Sairang leh Khamrang inkarah hian truck an la thang rei a, tihfuh loh chuan zan hnih te pawh an la thang. “Tlan par par kan la ni lo a, kawng siam vang te, tang an awm vangtein a din reng theih a, mahni kan tang lo a nih pawhin thil dang vangin a din reng theih,” MTDA hruaitute chuan an ti.