World Cup qualifying record tluktu Ronaldo!

World Cup qualifying
record tluktu Ronaldo!
Thawhlehni zan 2026 FIFA World Cup qualifying match pakhata Portugal-in 3-2-a mualneitu Hungary an hnehna goal khat thawhtu captain Cristiano Ronaldo chuan World Cup qualifying bika goal 39 thun tling awmchhun ni reng thin Guatemala mi Carlos Ruiz-a record ding lai a tluk ve chiah.
A career-a mellung thar phun thulh thei lo Ronaldo hian Budapest khaw inkhel second half tir lamah penalty atangin 2-1-a mikhual team hmahruaina goal a chhuihlut a, kha goal hmang khan record ding lai a nihrualpui ta a ni.
Kum 40 mi Ronaldo hian Portugal tan international game 223-ah goal 141-a khung tling ta bawk.
UEFA World Cup qualifiers Group F inkhelah hian minute 21-ah Barnabas Varga chuan Hungary hmahruaina goal khungin, minute 15 a kal leh tihah midfielder Bernardo Silva chuan mikhual siphurh a sut a, half time-ah team pahnih hi 1-1-in an intluk phawt.
Tarlan tak angin, second half tir lam minute 58-ah Ronaldo chuan penalty atangin Portugal hmahruailetna goal a khung a, mahse, goal hmahruai thuntu Varga bawkin hun pangngai tawp hma minute ruk la awmah Hungary siphurh a sut ve leh a; mikhual team hian an thah atanga minute hnih an khelh tlin rualin hmahruaina goal an khung chhunzawm ve leh zat a, Portugal chakna goal ni zui ta hi Joao Cancelo tihluh a ni.
Portugal hian UEFA World Cup qualifiers khelh hnihah hnehna chang ve vein, point ruk an khawl tawh hmangin Group F hma an hruai mek.