Serlui ‘B’ HEP tui luangral thin thlai chingtute tan hman tum

Serlui ‘B’ Hydro Electric Project tui hman hnu tam tham tak luangral thin chu a thlang lama thlai chingtute tana hman tangkai dan tur zirchian tum a ni.
Chief minister Lalduhoma’n Ningania Irrigation & Water Resources minister PC Vanlalruata leh department official-ten hma an lakna hrang hrang a sawipuinaah Serlui ‘B’ HEP tui hman tangkai dan dap hi tha tih a ni a. Sawrkar laipuiin leilet/ phai thlai tharchhuahna hmunah science thiamna sang zawk hmanga tui sem kual chu ram puma kalpui a tum mek avangin Mizoramah a thawh khatna turin Champhai leh Mat phai command area atan project thehluh phawt a ni.
An sawiho zingah, Tuidai Multipurpose Project Mamit, NABARD atanga sum hmuh vaibelchhe 29.6 senga thawh tur chu a thawktu tur zawn mai theih a ni tawh tih sawi a ni a. Mat Valley Integrated Water Resource Management & Climate Resilient Irrigation Project Serchhip chu detail project report peih thawkhat tawh niin, a bawhzuitu tur Core Group din a ni. Tui vlak atan, thlai chawmna atan, tuihna humhalhna leh eco tourism ngaihtuah chunga DPR hi duan niin, Brahmaputra Board-in state budget pawn lam atangin a thawhna tur a ngaihtuah dawn a ni. Brahmaputra Board kal tlang bawk hian Tlawng lui springshed rejuvenation kalpui dan dap a ni bawk.
Mizorama national hydrology project leh State Water Informatics Centre kal zel dan tur pawh sawi a ni a. Ngur- Vapar Multipurpose Dam siamna tur hmun chu forest clearance buaipui tan tura tih a ni.
Chief minister chuan kuthnathawka eizawng kan tam avangin loneituten tui tha an mamawh em em a. An department hian an tana hma lak theihna an nei ngah hle tih a sawi a. Project tha tak an neih phawt chuan bawhzui zel a ni dawn tih a sawi a ni.