Mahni tawnga kan sawi tawng danga hriattir theihna app siam

Mahni tawnga kan sawi tawng
danga hriattir theihna app siam
Mahni hnam tawnga kan thil sawi, hnam dangin anmahni hriatthiam theiha an lo hriat ve leh theihna tur application – BHASHANI app chu Mizoramah a hman ve theih dawn a. Zirtawpni khan hemi chungchanga hriat tur tul inhrilh a ni.
‘BHASHINI Rajyam Workshop: Mizoram Chapter’ hi Information & Communication Techology minister Dr Vanlalthlana’n a hawng a. Workshop hi sawrkar laipui Ministry of Electronics and Information Technology (MeitY) hnuaia awm Digital India BHASHINI Division (DIBD) leh Mizoram ICT department tangdun buatsaih a ni.
BHASHANI app (Bhashini language translator tia hriat bawk) hi AI (artificial intelligence) behchhan mobile application a ni a. India ram tawng hrang hrang mahni tawng hriatthiama lehlin theihna app niin, hei hian tawng hrang hman avang inbiakpawhna lama harsatna awm thin a sutkian beisei a ni. Voice -to- text, text -to- voice leh text -to- text a tih theih a ni.
Mizoram sawrkar leh DIBD chuan kumin June 18 khan thawhdunna thuthlung ziak tawhin, BHASHINI hi Mizorama tangkai taka hman a nih theihnan state chhunga tawng hrang hrang pawh AI khawl hi zirtir tura ruahman a ni.
ICT minister chuan BHASHINI app hmang hian state pawn amite hnenah mahni tawnga kan ram chanchin kan sawi pawh an hrethiam vek thei tawh dawn tih a sawi a. Mipui hamthatna tura sawrkarin digital service hrang hrang a chhawpchhuah thin pawh tawng hriatthiam loh avanga a chhawrtu turten an bawhzui ngam loh thin kha, tunah chuan a awlsam phah tawh dawn tih a sawi a ni.
Workshop-ah hian Mizoram-a BHASHINI technology hmang tura sawrkar department hrang hrangin roadmap an siam dan tur sawiho a ni a. College, pawl leh sawrkar department bakah tlawmngai pawlte leh thuthar thehdarhtute sawm an ni.