CSS hnuaia hlawhla te lo lungngai suh u – C Ngunlianchunga, MLA

CSS hnuaia hlawhla te
lo lungngai suh u
– C Ngunlianchunga, MLA
Congress a sawrkar a nih chuan CSS leh central scheme hrang hrang thawktute chu a that theih dan berin an dinhmun an siam dawn tih MLA C Ngunlianchunga chuan a sawi.
Inrinnia Zemabawk South Lungbial Venga an party programme a hmanpuinaah MPCC vice president C Ngunlianchunga chuan, Pathian leh mipui zarah Congress a sawrkar leh a nih chuan CSS leh central scheme hrang hrang thawktute chu an that theihna tur berin an dinhmun an siam dawn tih sawiin, “Inthlan campaign laia ZPM intiam ang mai mai kan ni dawn lo. CSS a thawkte lo lungngai suh u,” a ti.
Tuna an party president Pu Lal Thanzara chu Health minister a nih lai khan CSS-a thawk, health worker leh nurse engemawzat an dahnghet a. Fair takin seniority-in an kal mai a. ZPM sawrkarin hna lak an nih dan a fair lo an ti chu fair lo an hriat chuan chhui rawh se, tiin a sawi bawk.
Mizorama ram rotling kan neih, Sairang thleng rel lian chi kal theih, Tuirial Hydro Electric Project, medical college leh thildang tam tak chu Congress sawrkar kut chhuak deuh vek an ni tih Congress MLA hian a sawi a. Tuna chief minister chu opposition MLA a nih laia Forest Act (FCAA) ‘Dan Sakei’ a tih pawh chief minister a nih hnuah ‘Dan sakei lo tih hi a mawl thlak’ ti leh mai mai tu a ni tih a sawi.
Rel kawng hawnga Prime minister a rawn kal dawn avanga kan bawngsa zawrh thuhruk tur tih chu a ze nghet neih loh thlakin a dawizep thlak bawk tih C Ngunlianchunga hian a sawi a. “Mizote chuan kan tradition-ah bawngsa kan ei thin a, kan nihna ang hian kan lang ngam tur a ni,” a ti.