BTS member RM-a’n a birthday lawm nan KRW 200M donation pe
BTS member RM-a’n a birthday lawm nan KRW 200M donation pe
BTS member Kim Namjoon, aka RM chuan a pianchampha pualin Seoul-a damdawi in pahnih- Seoul Asan Medical Center leh Korea University Medical Center-ah donation KRW maktaduai 100 ve ve a pe. Heng thilpek te hi a pianchampha, September ni 12-ah tak a hlan ve ve a ni.
Asan hian RM hnen atanga an thilpek dawn hi mit khawhmuh lama harsatna nei, sum lama harsatna avanga inzai thei lo te enkawl nan an hmang dawn a, Korea University Medical Center pawhin mi harsa zawkte enkawl nan an sum dawn hi an hmang ve dawn bawk a ni. RM pawhin a piancham puala a thilpek chu damlo harsa zawk ten an tangkai pui ngei a beisei thu a sawi bawk.
RM hian September ni 12 khan kum 31 a tling ta a, a piancham pual ian Weverse-ah live session neiin, hetah hian a pianchampha puala BTS member Jin-a zungbun pek, nupui pasal nei ten zungbun an inbuntir thinna kutzungtanga a bun avanga fans thenkhatin an fiamna te pawh a chhang let a, BTS-in album thar an buaipui meknaa an thil tawnte a sawi chhuak bawk.
RM chuan BTS member te chuan an comeback album tur an buaipui mek thu sawiin, kum tharah an tlangzarh tawh dawn a, RM chuan, “Engtiangin nge a rawn chhuah dawn ka la hrethiam bik lo a, in duh zawng a ni dawn nge dawn lo pawh ka hrethiam rih lo, mahse, mi tam zawkin an ngainat theih tur ni a kan rin angin kan kalpui zel a ni,” a ti.
Hetia a tawng mawlh mawlh lai hian fans lamin a zungbun thar chu an hmu ta a, pakhat chuan, “Wedding finger-ah zungbun i bun leaw? Eng nge ni ta?” tih te, “Jin-a zungbun pek che i wedding finger-ah i bun sia. Innei tihna em ni?” tih te a ni deuh nawk.
RM chuan a piancham-ah hi BTS member dang Jimin leh V te nen an lawm thu sawiin, “Nizan khan restaurant-ah V nen zanriah kan ei a. Whiskey thlem Jimin nen kan lem ve sek a. Jin nen pawh inhmuin zungbun hi min pe a. Inneih lam a la lang lo, tu nen mah kan innei lo. Nizan khan, Jimin inah kan lem sek a, eng eng emaw sawiin kan ti ti nual a ni.
“Hei hi (zungbun) Jin min pek a ni! Ka zungtang palinaa ka bunna chhan chu hetah chiah hian ka bun mtawk vang a ni. Jin pawhin a dangah khan i bun tawk lo em ni? min ti deuh reng alawm. Zungtang dangah ka tawk tlat lo. Enmah teh u, Jin hian zungtang dangah pawh min bun tir tumin ka bei chhin a, mahse, a tawk tlat lo. Chuvangin duhthlan tur dang a awm lo, ring finger-a bun mai a ngai ta a ni! Nupui neih ka la tum lo a, ka la nei lo bawk,” a ti.