Rubio-a’n Israel a tlawh, Gaza City chhu chhe chhunzawm zel

Rubio-a’n Israel a tlawh, Gaza City chhu chhe chhunzawm zel
US Secretary of State Marco Rubio-a’n indona kal meka kal zel dan tur thlithlai tura an ram a thlen lai mek Israeli sipaite chuan Pathiannia khan Gaza City-a mihring chenna 30 vel an chhu chhe leh a, mi sang tel awmna tur nei lovin an awm leh phah.
Israel hian Palestinian maktaduai chuang awmna khawpui hi lak a tum a, hei hi hel pawl, Hamas chhut chimih a tumna pakhat niin an tanhmun lian pakhat ni mek chu nuai chhiat vek tumin a bei mek.
Hamas hruaitu, inkahhai a awm theih nan leh an mi hren mekte chhuah an nih theih nana Israel nena indawr mekte pawh Israel hian Thawhlehni khan Doha khawpuia an awmnaah a kap bawk a, ram hrang hrangin hei phei chu an dem nasa hle.
Qatar hian an khawpui kah a nih hnuah Arab-Islamic summit chu Thawhtanni khan ko nghalin an kal zel dan tur an sawiho.
Rubio-a hian Washington hian Hamas-in Gaza Strip-a mi an la hren mek 48-te chhuah theih dan tur sawiho a duh tih a sawi a, tuipui kam siam that leh dan tur pawh ngaihtuah a duh tih a sawi a. Tunah hian mi hren zinga 20 chauh hi an dam tawha ngaih a ni.
“Thil thleng chu thil thleng a ni mai a. Israeli hruaitute hmuin kan hma lam zel tur sawi turin ka kal dawn a ni,” tiin Rubio-a hian Israel a pan hmain a sawi a, Thawhlehni thleng hi a cham dawn a ni.
Israel a thlen hnuah Rubio-a hian Jerusalem-a Western Wall-a Judate tawngtaina hmun a tlawh nghal a. Prime Minister Benjamin Netanyahu-a nen an inbe zui ang.
Western Wall tlawh hi ‘America-in Jerusalem hi Israel khawpui a ni’ tih a pawm nemnghehna a ni tih State Department thuchhuah chuan a tar lang.
Kum 2017 tawp lam khan president a nih hmasakah Donald Trump-a chuan Jerusalem hi Israel khawpui a nih thu puangin US embassy pawh Tel Aviv atangin a sawn zui.
Hetih lai hian United Nations Relief & Works Agency for Palestine Refugees (UNRWA) Commissioner Philippe Lazzarini-a chuan Pathianni khan Gaza hmar lama damdawi in siam chawp an kalpui awm chhun, Beach camp clinic chu an kalpui zui thei tawh lo tih a sawi.
Tui leh thil dang mamawh chu a zahve chauh an nei tawh a, ni li liam ta chhungin Gaza City-a UNRWA building 10 chu kah fuh a ni bawk tih a sawi.