Kirk-a thattu engmah an la zawt chhuak thei rih lo

Charlie Kirk-a thattua puh chhui hna thawh mekah ‘thuneitute a pui tha rih lo hle’ a, a kah a ni tih pawh a la inpuang lo tih Utah Governor Spencer Cox chuan US chanchinbu mite a hrilh.
Kum 22 mi, Tyler Robinson-a hi Nilainia Orem-a right-wing activist kum 31 mi, Kirk-a a kah hnu darkar 33 velah man a ni.
ABC News hnenah Republican Cox-a chuan Robinson-a bula awm hnai thinte chuan an thawhpui tha vek tih a sawi.
Cox-a hian Pathianni tuk (India-a zan) khan US chanchinbu mite kawmin social media-a Kirk-a thihna chungchang tar lan hrang hrangte a sawi chhuak.
Governor hian New York Times chanchinbuin Robinson-a’n mi a kah hnu khan Discord messaging platform hmanga mi a bia tih an tar lan leh fiamthu a thawh nia an sawite pawh a sawi lang.
ABC News hnenah, “An thil sawite kha a ni tak tak tih kan finfiah tawh a; mahse, a mi biakte khan ama tih a nih an lo ring pa lo vek a. Amahin a tih ngei a ni tih a inpawm hma chuan fiamthu pawh a la ni reng bawk,” a ti.
Robinson-a hi Ningani khan police-a a inpek hnuah man a ni.
Kirk-a hi Utah Valley University-a a pawl din, Turning Point USA-in hun an hmannaa khawlaia thu a sawi laiin kah a ni a, a thi.
An hun hman hi American Comeback Tour zinga mi niin US-a college campus hrang hranga thu a sawina hun a ni.
Utah sorkar lehkhaa a lan dan chuan Robinson-a hi tual that, dik lo taka puak thei chelek leh dan rorelna zawm lo thubuai siamsak mek a ni a. Utah County Jail-ah bail theih lohva tantir mek a ni.
“Mi hrang hrang kan kawm a, kan kawmten an lo hre zel a, a tihchhan hi hriat chhuah belh zel kan tum a ni,” tiin Cox-a chuan a sawi.
Governor hian an mi kawm zingah hian Robinson-a’n pindan a lo luahpui thin, a kawppui nia insawi pawh a tel tih a sawi.
Ani hian a kap ang tih rin ngaihna a hre lo tih a sawi a, chhui hna thawktute chu tha taka thawhpui zel pawh a tum niin Cox-a chuan a sawi.