A insawi anga sawrkar a awm lo hi kan lungawilohna pakhat a ni – AMCECC

An dinhmun siamthat phuta nawrh an lo huaihawt tuma sawrkar lamin a insawi anga a hnua a awm zui lo chu an lungawilohna pakhat a ni tih CSS employee-te intelkhawmna pawl chuan an sawi.
All Mizoram CSS Employees Coordination Comittee (AMCECC) chuan sawrkara thil phut neia lungawilohna an lantir tawhna in awmzia a neih loh avangin, nawr chhunzawmna atan Thawhlehni khan Mizoram pumah sit-in demonstration an nei.
Aizawl district bik chuan Joint YMA Field Vaivakawnah hun an hmang a. AMCECC hruaitute sawi danin, kumin September 9-11 chhung khan sawrkara an thil phut nawrna atan mass casual leave an la a; an lungawi lohna hrang hrang hi – sawrkara an representation thehluh a bo tak avangte, CSS employee ni loin CSS Regularization Scheme an hmang leh, dan loa lak tia Zoram mipui hriata chief minister-in a auchhuahpui vang niin an sawi.
Sawrkarin CSS-ten sawrkara regular-a an luh ve theihna tur – CSS Regularization Scheme an siamsak chu a hmang turten an hman theih lohna turin office memorandum an siam leh si chu tha an ti lo hle a; CSS thawktute hamthatna tur siamsak ve siin, an kawng an danpin sak leh vek niin an sawi a ni.
“Hemi chungchangah hian nawrh kan lo huaihawt tawh a, chutah chuan sawrkar nen inbia in, inremna siam a ni. Scheme hi a tul anga ennawn bakah office memorandum siamthat an tum thu sawrkar lam hian an lo sawi tawh a, chumi a hlawhtlin theihna tur chuan AMCECC-in sawrkara representation thehlut turin min ti a, an thurawn ang hian AMCECC chuan representation hi kumin May 19 khan kan thehlut a, kan representation hi a thlenna tur thleng loin a bo ta a ni,” an ti.
CSS Regularization Scheme chu CSS employee-te hman theih loh tura danpin a nih laiin, CSS employee ni lo, Health department hnuaia health worker, MR skill-II tura lak, a hnua provisional employee-a leh ten an hmang daih niin an sawi.
“Heng ho aia senior zawk tam tak an awm lai leh, chu’ng senior zawkten an hman theih loh lai a, junior zawk leh CSS employee pawh niloten an hmang hi thil dik ni theiah kan ngai loa, CSS Regularization Scheme hmanga provisional employee an dahnghehna order hi sut leh turin kan ngen a, senior zawkten an hman hma chuan junior zawkte hman kan remti lo a ni,” an ti bawk.
CSS employee-te dan loa lak tia sawi chungchangah, dan ang thlapa lak an ni a, a hunlai ang zela scheme leh state sawrkar hnuaia competent authority-te phal ang thlapa lak an ni tih AMCECC hruaitute hian an sawi. CSS hnuaiaah hian Committee pawimawh tak tak leh thuneihna sang tak nei an awm a, chu’ng Committee remtihna leh phalna thlapa lak vek chu an ni tih an sawi a ni.
“Heng Committee-ah hian chief minister chairman-na, chief secretary chairman-na bakah department secretary enkawl committee a awm a, chu’ng committee hrang hrangin dan dik an tih ang thlapa lak kan ni. Heti chung a, State Committee sangbera chairman nihna hial chelhtu berin dan loa lak, tia a sawi fo hi dik kan ti loa, dan loa lak kan awm a nih chuan a latu committee leh member-te chhuichhuak a, dan anga hremna lekkawh turin kan ngen a ni,” an ti.
AMCECC-in sit-in demonstration a huaihawt hi Sub-Headquarters hrang hrangah pawh hman niin, Aizawl district-ah hian Joint YMA Field Vaivakawn bakah Darlawn leh Sialsukah hman a ni a. Mamit district-ah chuan Mamit, Reiek, W Phaileng, Kawrthah, Zawlnuam, Marpara & Rajivnagar ah hman a ni. Kolasib district-ah Kolasib & Bukpui; Champhai district-ah Champhai & Farkawn; Lawngtlai district-ah Lawngtlai, Chawngte, Bualpui NG, Sangau leh Lungpher; Lunglei district-ah Lunglei Venglai, Zobawk leh Tlabung; Siaha district-ah Saiha District Playground; Saitual district-ah Saitual & Phuaibuangah hman a ni.
AMCECC hian an hmalakna hi a hlawhtlin hma chuan tawpsan an tum loa, an kal zel dan tur an la rel dawn tih an sawi a ni.
CSS hnuaia hnathawkte lungawi lohna lantir hian zirna in bakah ni 100 inhlawhna MGNREGS buaipuitu leh damdawi in kaihhnawih lam a nghawng nasa zual nia thu dawn a ni.