Inneih rei theih dan!

‘Thihna in min then hma loh zawng,” kan ti taknain, nupa inthenna hi a tam telh telh a, nupa nunah harsatna eng emaw kan tawk a, a tihdan awlsam ber chu inthen mai tur emaw kan ti ta mai ni te pawhin a lang.
Nupa karah harsatna a lo thleng ve chawk a, chutiang hunah chuan engtin nge kan tih ang? Hma kan lak loh chuan boruak chu ama tawkin a tha leh ngawt dawn lo va, thiltha kan duh chuan eng emaw kan tih ngei a ngai a ni. Chuvangin, in harsatna te chu hlamchhiah a, en liam mai lo vin, nupa hlim tak ni a, nghet taka inneih theih dan a awm niin relationship lama mithiam ten an sawi.
1. Nupa chu titi dun fo tur a ni. Nupaa titi-na hun in neih loh chuan in hriat loh hlanin in inkar boruak a lo chhe mai ang. Nupa karah zêp awm lova engkim inhrilh tlang te kan ti a, chutianga inhriat pawhna boruak tha nei tur chuan nupa chu titi dun fo a ngai. I hna vangin i buai a ni thei, fate enkawl reng rengin i vir a, inchhung sekrek khawih a lo ngai bawk nen, chutah khawtlanga i inhmanna lamah chhuah deuh sek a lo ngai bawk si. Mi buai tak i nih pawhin nitin minute 15 vel tal i kawppui nena titi dunna hun insiam ang che. Eng gne in sawi ang- hna chungchang a ni thei a, chhungkaw inrelbawlna chungchang a ni thei a, engkim a leng vek.
2. Inzahtawnna a pawimawh hle. Inzahtawnna tih hian inzah lutuk vanga inbiak that ngam loh te, mahni duhdan engmah sawi ngam loh te, tih vel lam a ni lo. I nupui/pasal a nih anga zahawmna a neih kha vawn him sak tur a ni. In inneih tak vanga i bungraw pakhat a ni ta tihna a ni lo. I thuhnuaia dah a, i duh duha i tihkual vel tur tihna a ni lo. In pahnih chauha in awm lai emaw, in chhungte leh midang hmuh awm ve lai pawh ni se, hnehsawh tak tak a tih kual vel te chin loh tur a ni. In ngaihdan a thuhmun lo a nih pawhin a ngaihdan chu zah sak ve tur a ni.
3. Mahni thu leh duhdan tih tlang tum bur tur a ni lo. Kan duh dan a thuhmun lo a nih pawhin inremsiam te hreh tur a ni lo. Mipa thenkhatin nupui te thu a nih hrim hrim chuan hnial vek te kan tum ta thin a, hei hi thil atthlak tak, nupa inkar boruak tichhetu mai a ni. Nupa chuan dam dun chhungin thil tam takah ngaihdan inan lohna kan nei ngei dawn a, chutiang hunah chuan inremsiam leh thulai lak te hreh hauh loh tur a ni. Chutia kan tih vanga tha zawk leh dik zawk ni a i hriatte chu paihthlak zel tur tihna erawh a ni lo. In pahniha lungawina tur kha ngaihtuah thiam ngai kan tihna a ni.
4. Sum leh pai chungchangah nupa inkarah chuan engkim langtlang taka tih tur a ni. In nupain bank account hran i nei a ni thei a, a pawina a awm chuang lo, mahse, in pawisa neih dan erawh in inhriat tawn sak a tul thung. |hiante leh chhungte pawisa puk tir dawn pawhin nupaa hriat zel a tha. Sum chungchanga inrinhlelhna a awm chuan a pawi hle a, nupa kar tichhetu langsar tak pakhat a ni.
5. Kan kawppui te chhungte nena kan inlaichinna siamthat hi a pawimawh hle. Hei hi sawi mai chu a awlsam a, a taka tih erawh a harsa viau thin. Kan kawppui chhungte nena kan inngeih tlat loh chuan nupa inhauhna tlen tamtu ber pawl a ni a, chutih rualin, kan kawppui chhungte nena kan inbiak thiam viau chuan nupa hlimna thlentu leh min phuar nghettu an ni leh hlauh si. I kawppui chhungte nen boruak tha nei tur chuan i chapona te dahthain theih tawp chhuah ang che.
6. In inkarah inngaihzawnna boruak kha vawn nun tum ang che. Inneih hnuah kan inngaihzawnna boruak kha kan hlamchhiah tial tial a, inngaihzawn laia romantic thei viau si kha inneih hnuah romantic nachang kan hre lo ta tlat thin a. Nupa chu in-duat a, kan inhmangaihna te lantir a, ‘quality time’ hman dun fo tur a ni.