Power pek leh insem dan thar duang State-in ama ta a thar ran dan tur rel

Mizoram-in power a hmuhna pui ber Tuirial Hydel Power Station atanga power lakna 132kV line-ah harsatna a awm changin kan power mamawh (demand) phuhru turin hmun dang (generating station) atangin ruahman (schedule) sa ni lo power lakluh ‘overdraw’ a ngai thin a. Overdrawal hi tih a nih loh chuan power mamawh zat kan hmuh tak loh avangin load shedding kalpui a ngai thin tih sawi a ni.
Tuirial HP atanga kawlphetha lakna line dang, Tuirial 2nd evacuation line siam mek ni mah se, zawh a la ni loa, hei vang hian he harsatna hi kan tawk ta tih an sawi a ni.
Central Electricity Regulatory Commission (CERC) chuan Indian Electricity Act 2003-in thuneihna a pek angin CERC(Ancillary Services) Regulation 2022 a duang a. He regulation hian eng state pawhin National GRID atanga a power dawn tur bituk(schedule) aia tam a overdraw chuan, a overdraw-na zat (quantum) hi a rang thei ang bera grid-ah chhunglut (recover) nghal turin a ti a. Hemi atan hian state tin chu kum 2026- 2027 atang chuan reserve power nei tura tiin, an reserve neih zat tur pawh a hma kuma an overdraw zat (quantum) atangin National Load Despatch Centre-in a chhut sak dawn a ni.
Kum 2024 chhunga kan overdraw-na hisapa Mizoram-in reserved power a neih ngai zat chu megawatt 75 turin chhut a ni a, hemi hisap hi chuan kumtin cheng vaibelchhe 75.6 vel senbelh a ngai dawn. Kum 2026- 2027 a power reserve kan leina senso tur chu kum kal mek, 2025-a kan overdraw quantum atangin chhut a ni anga, chutihlaiin ‘overdrawal’ tih avangin Mizoram sawrkarin August 2025 chhung chauha pawisa (penalty) a chawi chu nuai 85 chuang a ni thung.
Heng harsatna pumpelh tur hian state tharchhuah power-a intodelh a tul zia thutkhawmah hian sawi a ni a. Chumi atan chuan Mizoram sawrkarin hydel project thar a buaipui mek Mw 132 pe thei tur Tuivai HP pawh nasa zawka bawhzui rel a ni. Tuivai HP hi a tirah public- private partnership mode-a tih tum ni mah se, state sawrkar ta liau liau a nih theihnan a tul anga bawhzui rel a ni.
CERC (Ancillary Services) Regulation 2022 a taka hman dan tur zau zawka inrawn khawm a, uluk zawka la ngaihtuah leh atan dah a ni a. Heng harsatna awm theite hrechiang a, dawhthei taka sawrkar hmalakna ngaichang turin mipui an ngen tih sawi a ni bawk.