Album thar ‘Here for It All’ nen Mariah Carey a rawn comeback leh ta

Album thar ‘Here for It All’ nen Mariah Carey a rawn comeback leh ta
Mariah Carey chuan tun kum sarih chhunga a studio album hmasa ber leh a studio album 16-na ni bawk ‘Here for It All’ chu nimin khan a tlangzarh, hla 11 awmin, chung zingah chuan ‘Type Dangerous’ leh ‘Sugar Sweet’ featuring Shenseea& Kehlani te pawh a tel a, Anderson .Paak nena an thawh dunna ‘Play This Song’ leh The Clark Sisters a thawhpuina ‘Jesus I Do’ tih hla te pawh a tel.
‘Type Dangerous’ avang hian 2025 MTV Video Music Awards-ah khan best R&B a dawng a, rimawi khawvela hei lehchen inhmang tawh a, khawvela a ber pawla chhal ni reng chung siin competition category-a MTV VMA a dawn hmasak ber a ni. Kumin MTV VMA-ah khan Video Vanguard Award a dawng bawk.
Album thar sawi takah chuan Cardi B album thar, a album pahnihna ni bawk ‘Am I the Drama?’ pawh karleh Billboard 200 (US albums) chart-ah No.1 kai thei tura rinkai zingah a tel a, he album hi September ni 19-a a tlangzarh kha niin, a album hmasa zawk ‘Invasion of Privacy’, 2018-a a tlangzarh atanga kum sarih ral hnuah a album thar kan hmu leh chauh a, a album hmasa zawk kha Billboard 200 chart-ah No.1 a kai a, he album hla Bad Bunny leh J Balvin te a zaipuina ‘I Like It’ chu Billboard Hot 100 (US singles) chart No.1 a kai a, he album-a a hla dang, a lead single, 2017-a a tihchhuah ‘Bodak Yellow (Money Moves)’ pawh Hot 100 No.1 a kai a, he album avang hian Grammy Award, best rap album a dawng bawk.
A album thar hi hla 23 awmna niin, hralh pawh a kal viau a, a album hmasa kha a kar khatnaah US-ah copy 2,55,000 chuang a hralh thei a, kha kha a khum theih chu a beiseiawm chiah lo niin hetiang lam chhut mi ten an chhut a, 2,00,000 erawh a hralh tlin theih an beisei.