Tluangi leh Rinpuiite pawl chak leh

Tluangi leh Rinpuiite pawl chak leh
Mizo tleirawl pahnih Lalthantluangi leh Lalrinpuiite khelhna Indian Junior Women’s Hockey team-te’n Australia tour an neih mekah nimin khan an match 4-na chu Australia Premier Hockey One Leaque Club, Canberra Chill nen an khel a, he match-ah hian India chu 3-1 in an chak.
He inkhelah hian mualneitu Canberra Chill chuan tan atanga minute 11-naah goal hmasa ber leh an goal neih chhun chu an thun a; he goal hi minute 13-naah India midfielder Ishika chuan a rawn chhanglet ve leh nghal.
1-1-a an in-draw hnu hian India forward Sonam chuan India hmahruaina goal a rawn thun zui ve leh bawk.
India-in 2-1-a hma an hruai hnu hian an chakna tichiang lehzual turin Ishika bawk chuan minute 39-naah an goal thumna chu a rawn thun leh ta a ni.
Nimina inkhelah hian Mizo tleirawl pahnihte hian goal khung lo mah se an chetha dun hle a ni.
Ti hian, India hian he tour-a match nga an khelh turah match li khel tawhin, vawi hnih chakin vawi hnih bawk an tlawm tawh.
India hian he tour-a an match ngana leh an match hnuhnung ber chu October ni 2, naktuk, Ningani hian khelmual ngaiah Canberra Chill nen bawk an khel leh ang.