Season kal laia a vawi riatna atan Alcaraz champion

Season kal laia a vawi riatna atan Alcaraz champion
World number one Carlos Alcaraz chuan Taylor Fritz laka 6-4 6-4 hnehna changin Japan Open-ah a champion a, tun season kal laia ATP title pariat a lak tlinna chiah a ni.
Tokyo khaw tournament final-ah Alcaraz hi first round-a a kheimit hliam khan a tibuai lo a, American lakah harsatna lian lutuk tawk loin hnehna a chang.
Grand Slam-a vawi ruk ngawt champion tling tawh Alcaraz hi kumin July thla Wimbledon final-a Jannik Sinner laka a tlawm hnu khan ATP title pathum a la zawn tling ta a, chu’ngte chu – Cincinnati Open, US Open leh Tokyo Open-te hi a ni.
Japan rama a hnehna sualchhuah thar ber nen kum kal laiah Alcaraz hi match 67 a chak tling ta chiah a, nikuma match 73 chak tling Sinner a pha chho thei mai tura ngaih a ni.
Hetih lai hian Italian Sinner pawhin 6-3 4-6 6-2-a Alex de Minaur hnehin Beijing khawpuiah China Open final a lut ve leh tawh bawk.
Sinner hian a tum hnihna atan China rama title lak a tum a, kum 2023 khan Beijing tournament lianah hian champion tawhin, nikum final-ah Alcaraz a ngam lo a, vawiin final-ah Learner Tien a hmachhawn dawn a ni.
Semi-final lehlamah set thumna an khelh laiin Daniil Medvedev chu hliam avangin a inhnukdawk a, American rawlthar kum 19 mi Tien hian a career-a a vawi khatna atan ATP Tour event a luh phah ta a ni.
Russian Medvedev hi US Open-a a nungchang mawi lop avangin US dollar 42,500 chawitir a ni a, Beijing last four-ah vanduai zuiin, world number 52 Tien chuan a nihlawh phah ta a ni.