Ruihhlo vanginmi 65-in nunna chan tawh

Ruihhlovin kawng hrang hrangin Mizoram a tibuai a, kuminah pawh ruihhlo vangin mi 65-in nunna an chan tawh.
Mizoram Excise & Narcotics (MEN) department-in an chhinchhiah danin, kuminah September ni 16 thleng khan mi 65-in ruihhlo vangin nunna an chan tawh. Nikum khan kum tluanin ruihhlo vangin mi 67-in nunna an chan a, kumina thla riat leh a chenve vel chhunga nunna chan zatin a thlau lo hle.
An chhinchhiah danin, kumina ruihhlo vanga nunna chante hi mipa 54 leh hmeichhia 11 an ni a, a naupang ber kum 19 mi, a upa ber kum 57 mi a ni.
Mi 65-te zinga mi 24 chu heroin vanga nunna chan an ni a, mi 39 chu heroin leh damdawi ruihhlo dang khawih pawlh an ni. Pills leh tablet vangin pakhatin nunna a chan a, a khawih ber hriat loh pakhat a awm.
Ruihhlo vanga nunna chan zat hi 1984-ah an chhinchhiah tan a, 1984 leh 1985-ah ruihhlo vanga nunna chan zat hi pakhat ve ve a ni. 1986-ah nunna chan an awm lo a, 1987-ah panga an awm. AN chhinchhiah danin 2025 September ni 16 thlengin Mizoramah ruihhlo vangin mi 1944-in nunna an chan a, mipa 1707 leh hmeichhia 237 an ni.
Ruihhlo hi a hluar telh telh tia sawi theih a ni a, tunlaiin Aizawl khawlaiah a zalen hle. Heroin a lar a, ganja pawh a lar. Opium, meth leh crystal meth te lakah Mizoram a la himah ngaih a ni a, mahse heng ruihhlo hlauhawm hi man tur chu a awm deuh reng. Chu chuan Mizoramah ruihhlo a tamzia tilang awm e.