CM-in Buangpui YMA Golden Jubilee hmanpui

Nimin khan Chief Minister Lalduhoma chuan a bial Buangpui Community Hall-a Buangpui Branch YMA kum 50-na (Golden Jubilee) lawmna chu khuallian niin a hmanpui.
Chief Minister chuan YMA chu pawl zahawm leh thianghlim, mi zawng zawng lenna a ni, a ti a. Village Council-te hi tha hle mah se party leh party inepna boruak keng chunga din an ni a. Inthenna (division) a nei nghal a. Kohhrante pawh hi a tha lutuk, nimahsela, kohhran hrang inkarah indaidanna (division) a awm sa tlat a. YMA erawh chu mi tin lenna, daidanna engmah nei ve lo, Mizo hnam huikhawmtu, kristianna pen bosan si lova Zo nun ze mawi chhawm nungtu leh zirtirtu a ni, a ti.
Chief Minister hian Thenzawl leh Buangpui ramtea hmasawnna ruahmanna sorkarin a neih mek thenkhatte a tarlang a. Thalaiten zirna an uar a tul thu te, ruihhlo laka fihlim a tul thu te, hmasawnna lo thleng zelin a ken tel inthlakthlengna lo dawnsawn thiam a tul thu te a tarlang bawk.
Buangpuiah hian kum 1800 AD velah khan helai velah hian Hmar Buangpui hote an lo cheng tawh a, an hmun hming leh sulhnute pawh hriat leh hmuh theihin an la awm. Tunah hian in 114 awmin mihring 518 an cheng mek a, an zinga mi 358 hi YMA member an ni.