Police lak a ni leh dawn – Home minister

Police lak a ni leh dawn
– Home minister
Tunah Mizoram Police-ah post ruak 3600 chuang a awm a, sawrkar chuan police a la leh dawn tih Home minister K Sapdanga chuan a sawi.
Serchhipa ZPM party hruaitute nen an inkawmnaah K Sapdanga chuan, Mizoram Police-ah hian tunah post ruak 3647 a awm a, kumtinin thihna leh pension avangin post ruak 200 chuang awm zel ang a ni, tiin, police indaihlohna a nasa em em tih a sawi.
“Kalpaha inlak ngawt theih a ni loa, chhungte boral ai pawh lak ngawt theih a ni tawh lo. Dan ang taka thil tih a ngai a, kum 2021 atang vel khan court leh India danpui a thikthu a chhe riau a, sawrkar hmasate kha dan khaikhup san chungchangah keini aiin an lo ngam hret a, sawrkar liamta pawh kha an hun hnuhnung lamah chuan an fimkhur tawh hle,” a ti.
Police post ruak tam lutuk tiziaawm turin Home department a inbuatsaih leh mek a, DP&AR leh Law department-ah dilna thehluh a ni dawn Home minister hian a sawi.
Police lak hnuhnungberah khan post 1100 an dil a, DP&AR leh Law department lamin mi 250 a phalsak thung a. Police Headquarters atangin survey an nei a, district tina police indaih loh dan report an lakhawm mek tih a sawi a ni.
Hmun hrang hranga police quarters an awngrawp tawh hle a, hei pawh hi a chhiat dan leh tihzui dan tur November thlaah report kim theih beisei a ni a, thuamthat tum a ni tih a sawi.
Mizo Territorial Army din tur pawh thla tharah advertisement chhuah tum a ni tih minister hian sawiin, a tirah mi 75 lak tura tih a ni a, an dil belh leh a, mi 150 lak phalsak an ni tawh tih a sawi bawk.