AR chhuahsan ram 60.67% ‘green area’ ah siam dawn
Lammual chhehvel Assam Rifles chhuahsan ram zaa 60.67 chu khawih buai loha hmun ngawa siam a ni dawn. Assam Rifles chhuahsan ram hman dan tur ngaihtuahtu Advisory Committee on AR Land chu a tum thumna atan Ningani khan chief minister Lalduhoma kaihhruaiin an thukhawm a, rawtna lut hrang hrang an thlirho.
Master Plan siamthat an thlir a. Ruahmanna thar ber ang chuan, a ram zawng zawng zaa 39.33 hi mipui mamawh hmunhma sakna (built -up area) tur niin, a dang zaa 60.67 chu ‘green area’ a ni ang.
Ring Road ni nghal Aizawl Square – chhuah lama bypass road, hmar lamah Saron Veng atanga kal, Dak Inpui bula chhuak sial; mi 2000 lenna Convention Centre, a hnuai lam lirthei park-na liantham tak nei sak; kawngpui kam hmun hniha Mini Park siam; two wheeler parking siam; Heritage Court siam; Bypass road kiang Venghlui lam hnaiha multi level car parking leh open air theatre sak a pawm a. Khawpui laili chawmtu tur Baja Tlanga tui dah khawlna sak leh chhuah lam bypass road kianga 33 kV Sub Station dah an remti.
Tuna kawngpui awmsa hi a theih ang anga tihzauh nise an ti a, lungphun awmsa vawnhim tha an ti. Canteen kuala War Memorial chu MINECO-a sawn an rel bawk.
Thutkhawm hmasaa Civil Hospital Aizawl tihzauhna atana Aizawl Police Station awmna hman a nih theihnan Police Station hi AR Hospital tlangah sawn nise, tia an lo sawi tawh chu, a hmunhma tura an tinzawnah a len theih dawn loh avangin, Aizawl P/S hi sawn phei chi ah an ngai leh loa, out post dah chi zawk nia ngaih a ni.
Khatlaa Assam Rifles ram mawng lam, Mizoram Secretariat tihzauh theihna lai tur leh Loch House, tuna Mizoram sawrkar kuta awm ta chu inthlengpui dil nise, a hlawhtlin chuan Chief Minister’s Office leh residence sawn pheina atan hman nise, an ti.
McDonald Hill Zarkawta CM office-ah meeting a tam thin a, Secretariat atanga kal hi traffic jam vangin a hautak a. He harsatna pumpelhna atan chief minister hmunhma MINECO lama suan phei hi thaa ngaih a ni.
Babu Tlanga AR ram chhuahsan, Zarkawt khawtlangin enkawl an dil chu a neitu nihna nei loa Green Park atana an enkawl theih dan tur inkaihhruaina GAD lamin lo duang se, an ti bawk.
Hmalakna tur pawimawh dang leh dilna lut belh pawh sawiho a ni.