2025 Victoria’s Secret Fashion Show an nei ta TWICE-in Victoria’s Secret Fashion Show-ah boruak an siam

2025 Victoria’s Secret Fashion Show an nei ta
Fashion khawvela show ngaihhlut leh huhang nei lian ber pawl, hmeichhe hnuailam thuamhnaw siamtu brand lar Victoria’s Secret chuan kumin atan fashion show chu October ni 15 khan New York City-ah an nei leh ta a, tunlai khawvel model hriathlawh leh kei ka ni inti pha chin te chu runway show-ah an inthehthil leh ta siau siau mai a, supermodel rual an inlan a, Gigi leh Bella Hadid, Adriana Lima leh Behati Prinsloo thleng an kim leh viau a, he runway show hi Victoria’s Secret Instagram, YouTube leh TikTok bakah Amazon Prime Video-ah live stream a ni.
He fashion show-ah hian Karol G, Madison Beer, Missy Elliott leh K-pop hmeichhe group TWICE te pawh an perform a, TWICE hian boruak an siam viau lehnghal.
Gigi Hadid hi Victoria’s Secret show-ah 2015 atanga inlan tan tawh kha niin, tunah chuan kum 30 mi niin, a ex Zayn Malik nena an fanu Khai pawh kum 5 mi a lo ni ve tawh, VS show pawh kum 10 kalta nen kha chuan a boruak a danglam tawh ni a sawiin, “VS Show neih dawn tuk pawh tunah chuan kan khawhai a dang ta deuh,” a ti.
Model Anok Yai chuan, “Show hnaih tawh lamah phei chuan kar khatah ni sarih chhung trainer ten mawng vawm ba ang sekin min tur tawh a. Kan thlalem vuah tur hnungzang tihrawl tihchak a lo ngai bawk. Walk mai a ni lo, engkimah nalh a ngai a ni tawp mai,” a ti a, mahse, “Hetiang em em a ka sexy hi ka la hre ngai lo,” a ti bawk.
WNBA star Angel Reese pawhin VS Angel nih a chak thu a lo sawi tawh thin chu a tak ramah an chantir ta a, model rual zingah a rawn inthehthil ve pawhin WNBA piah lamah pawh a zeihawi ngang mai.
Victoria’s Secret Angel, supermodel Barbara Palvin chu 2025 VS Fashion Show-ah ke na chungin runway-ah a inlan niin a pasal Dylan Sprouse chuan a sawi a, “Nu tuarchhel tawpkhawk a ni,” a ti. Dylan chuan, “Thla li vel liamta mai khan a kaphah ruh a tiauh a. A la dam chiang lo, inenkawl lai a la ni. Hetianga a tel leh thei mai hi a mak zawk a ni,” a ti bawk.
Kumin VS runway show-ah hian Olympic gymnast Sunisa ‘Suni’ Lee pawh a catwalk zân zân mai a, lawm a hlawh khawp mai. Suni Lee hi Olympic gold medalist a ni a, VS Fashion Show-a a inlan vawi khatna niin, gymnastic kalsanin modeling lamah pawh kal se a hlawhtling viau tho ang a!
TWICE-in Victoria’s Secret Fashion Show-ah boruak an siam
Kpop hmeichhe group TWICE chu Victoria’s Secret Fashion Show-ah an perform a, ‘This Is For’ leh ‘Strategy’ an perform. TWICE member Nayeon, Jihyo, Tzuyu leh Momo ten lawm an hlawhin boruak an siam khawp mai a, supermodel rual zingah pawh runway a hal inthehthil vel tur pawhin an iaiawm loh hlawm khawp mai.
TWICE hian an full-length album palina, kumin July thlaa an tlangzarh title track ‘This Is For’ a bul tanin, a hlathu hi hmeichhia te fakna leh chawimawina lam hla a ni bawk a fashion show nen pawh a inhmeh vel khawp mai, a lyrics-ah pawh “I wanna go where the baddest girls are from” tih te a ni deuh nawk. ‘This Is For’ dawtah hian an single ‘Strategy’ an pefrom leh bawk.
TWICE hian an perform-naah Victoria’s Secret PINK bst an inbel a, an khup thlenga sang boot an bun tah bawk. An backup dancer te leh an zai laia model inlan te pawhin PINK brand vek an inbel.
TWICE hi show neih hmaa pink-carpet-ah interviewer ten an lo kawm a, Tzuyu chuan, “PINK hi a hlimawmin a zalenna kan ngaina. Member pakua angin kan perform thin a, mahse, tun tum chu pali chauh kan ni dawn a, kan performance inhlimpui viau thoin ka ring,” a ti.
Kumin Victoria’s Secret Fashion Show-ah hian Karol G, Madison Beer leh Missy Elliott te an perform a, Karol G hi runaway-ah VS Angel angin a catwalk nghal bawk a, ani pawh a zahpuiawm loh khawp mai.
Madison Beer hi NFL star LOs Angeles Chargers quarterback Justin Herbert nena an relationship an tih ‘official’ hnua mipui hmaa a perform lehna hmasa ber a ni a, ani pawh hi modeling lamah pawh kal se a hlawhtling viau tho lo’ng maw!