Hna hmanhmawh thlak hoah restricted tender kan phalsak: – Chief minister
Fund hmuh hmanhmawh taka kalpui tul SASCI hna thenkhat chu restricted tender kalpui an phalsak tih chief minister Lalduhoma chuan a sawi.
Zirtawpnia Khatla Venga Working Women Hostel sakna tur lungphum a phumnaah chief minister hian, 15th Finance Commission hun tawp lama kan awm avangin state-in fund a hmuh chu hmanhmawh taka kalpui a tul a, SASCI hna thenkhat chu restricted tender kalpui an phalsak tih a sawi.
SASCI 2024- 2025 Part X-ah sawrkar laipuiin working women hostel sakna tur a ruahman a, Mizoram-in cheng vaibelchhe 127 hmu in, hostel pasarih sak an pawm tih a sawi. Khatla Working Women Hostel hi Mizo Hmeichhe Tangrual-in kum tam tak women hostel a lo kalpui tawhna hmun a ni, tiin, a building a upain a thar an mamawh tih sawrkarin a hria a. Mi tam zawk lenna neih a tul bawk nen, a thar sak sak an rel ta tih a sawi a ni.
“Hmasawnna hna kan thawh hi a hun taka zawh zel theih kan duh a, hnathawh tha kan duh a, revise ngai loa kal zel kan duh bawk. Chutianga kan kal theihnan chuan sawrkar hmalakna viltu tur State Monitoring Committee kan din a. An ni hian kan Women Hostel sak mek pawh hi a tul angin an endik thin ang,” chief minister hian a ti.
Mizo Hmeichhe Tangrual enkawl Khatla Women Hostel hi kum 1975-a sawrkar laipui Social Welfare Board atanga sum hmuh hmanga sak a ni a. Mi 30 awm theihna niin, a hnuah sawrkar laipuiin sum a pek belh hmangin an tilian a, mi 60 awm theihna a ni. A tharah hian chhawng sariha sang leh chhawng tina insukna hmun awm tura duan, room zawng zawngin inthiarna leh bual in nei vek tura duan niin, mi 140 an khawsa thei dawn a ni. A satu tur hi Sky Builders Zemabawk North a ni.
Working Women Hostel hi Mizoram-in 8 a nei mek a, a thar 7 hi peih an nih chuan 15 a awm tawh dawn a ni.
Mizoram sawrkarin SASCI 2024-25 Part X
atanga working women hostel a sak tur chu8 Mi 50 awm theihna Ramhlun Sports Complex Hostel, vbch. 14.01 senna tur
8 Mi 140 awm theihna Khatla Hostel, cheng vbch 29. 72 senna tur
8 Mi 50 awm theihna ITI Veng Hostel, vbch. 18.18 senna tur
8 Mi 120 awm theihna ZMC Working Women Hostel, vbch. 26.34 senna tur
8 Mi 50 awm theihna Lunglei Ramthar Veng Hostel, vbch. 14.09 senga sak tur
8 Mi 50 awm theihna Champhai Hostel, vbch. 13.66 senga sak tur
8 Mi 30 awm theihna Thenzawl Working Women Hostel, vbch. 11 senga sak tur
* Champhai tih loh hmun dangah hian hnathawh bul tan vek tawh a ni