MPL khel tur RVFC

On Oct 27, 2025 7 0

Ocotober ni 24, Zirtawpni khan Mizoram Premier League (MPL) 13 khel tur zawnna neih a ni a, Ramthar Veng FC (RVFC) chuan 4-1 a Ramhlun North FC (RNFC) hnehin MPL khel turin an tling. MPL 13 hmunruak pakhat la awm chu Ramhlun North FC ) leh Kanan FC ten an inchuh zui leh ang.
MPL 13 khel tur zawnna hmasaah Ramthar Veng FC hian an khingpui Ramhlun North FC lakah bul an tan tha lova, goal an chhuah hma hle. Inkhel tan atanga minute 8-na lekah Ramhlun North FC tan Alex Ramdinthara chuan hmahruaina goal a thun nghal. Hma takah goal an thun vangin an phur viau a, MPL khelh phak ngei tumin tan an khawh zui. Phur takin inlan bawk mah se goal li ngawt an chhuah a, tlawm zawkah an tang ta tlat thung.
RVFC tan hian Eddie Lalhmangaihzuala chuan minute 37-naah goal thunin an si phurh a sut. An si phurh an sut vangin an phur thar hluai a, goal dang pawh an thun belh leh thuai. Goal an thun atanga minute hnihna lekah PC Lalruatsanga chuan hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lama Ramthar North FC an khel tha chhunzawm a, goal hnih dang an thun belh leh. RVFC tan hian HP Lalremruata chuan minute 73-naah an goal thumna thunin an hmahruaina a tizau a, Stephen C Malsawmtluanga chuan minute 89-naah an goal lina thunin a tawp a khar. Stephen-a goal thun hnuin goal dang a luh belh thei tawh lova, Ramthar North FC chuan Ramhlun North FC lakah hnehna pawimawh tak changin Mizoram-a tualchhung inelna ngaihhlut hlawh tak MPL khel turin an tling zui ta a ni.
MPL 13 khel turin Ramhlun North FC hian hma an sawn chak hle a, season li chhung lekin vawi thum ngawt an champion hman. Kum 2019 khan III Division-ah champion in, II Division-ah an kai sang. Covid 19 hripui leng vanga inelna an hmachhawn theih loh vang vang hnuin kum 2022 khan II Division an hmachhawn a, champion nghalin I Division-ah an kaisang nghal bawk. Tatea-a enkawlna hnuaiah hma lam pan zelin I Division final-ah club lian Ramhlun North FC hnehin an champion leh nawlh bawk. Final-a an hneh tak Ramhlun North FC nen hian MPL 13 khel tur zawnnaah an inhmachhawn zui leh a, chungnung zawkah tangin top league khel turin an tling.
Ramthar North FC lakah tlawm bawk mah se Ramhlun North FC in MPL khelh theihna hun tha an la nei. RNFC hian vawiin hian MPL play-off ah Kanan FC an hmachhawn zui leh dawn a, an chak a nih chuan MPL 13 khel turin an tling ang a, MPL 13 a inlan tur team a hriat kim theih chiah bawk ang.