Real Madrid an chak

Pathianni zan khan season thara a vawi khat nan El Clasico khelh a ni a. Santiaho Bernabeu-a inkhel hmuhnawm takah Real Madrid in 2-1 in hnehna an chang. An elpui lian ber Barcelona lakah an chak vangin Real Madrid hian point 5 in hma an hruai fal chiah.
Santiago Bernabeu-a inkhela chak zawk zawk hi hmahruaitu ni zui tur an nih vangin El-Clasico hian ngaihven a hlawh hle. Season liam taah Barcelona ngam lo tak Real Madrid in an mualah chak ngei tumin tan an khawh a, goal thun hmasa leh tam zawk an nih an chhawr tangkai a, hnehna pawimawh tak an chang.
Real Madrid hian an mualah chak ngei tumin tan an khawh a, an mikhualte an ngam hle. Inkhel tan tir lamah Kylian Mbappe chuan pui zetin a pet goal nghal. Offside vangin Mbappe goal thun hi hnawl a ni thung. An goal thun hmasa hnawl ni bawk mah se Real in hun tha an nei leh thuai a, season kal meka goal thun thei tak mai Mbappe chuan sawisel tur awm hlek lovin minute 22-naah hma an hruaina goal a thun ta nge nge.
Hnufual zawk an nih hnuin Barcelona in ball an chang tam sauh a, an si phurh sut an tum ruh hle. Barca tan hian UCL a hattrick siam Fermín López chuan minute 38-naah goal thunin an si phurh a sut. Goal an thun vangin Barcelona phur viau mah se an phur rei lo. Chawlhlawk dawn hnaih minute 43-naah Jude Bellingham chuan hnaite atangin a pet goal a, hma an hruai nawn lehna goal thunin, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui hle. Barcelona in ball chang tam mah se Xabi Alonso enkawl Real Madrid an hlauhawm zawk. Hun pek belh tawp dawnah Barca player Pedri leh Andriy Lunin te hnawhchhuah an ni. Red card pahnih phawrh a nih hnuin goal dang a luh belh thei tawh lova, Real Madrid chuan an hmelma lian ber Barceloina hnehin point thum hlu zet mai an hmu.
Real Madrid hian season tharah vawi 10 khel tawhin point 27 an hmu a, point 5 in hma an hruai fal mek a, champion ngei tumin tan an khawh.