‘The Life of a Showgirl’ kar 3 a No.1 ta

On Oct 28, 2025 3 0

‘The Life of a Showgirl’ kar 3 a No.1 ta
Taylor Swift album thar ‘The Life of a Showgirl’ chu Billboard 200 (US albums) chart-ah a No.1 a, he chart-ah hian a zawnin kar thum a No.1-na a ni ta a, kumin a album tlangzarh-ah chuan an tlangzarh atanga a zawna kar thum No.1 ni thei pahnihna a ni. Hetihrual hian Tame Impala album thar ‘Deadbeat’ pawh chart top five-ah a debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mal a hralhna atanga album tlukpui te belhkhawm thin a ni.
Taylor Swift ‘TLOAS’ hi US-ah 1,94,000 hralh lehin, chung zinga 1,56,000 chu streaming atanga album hralhna tlukpui (on-demand official stream maktaduai 200.68) a ni a, album tak tak hralh chu 38,000 niin, album-a hla a mal a hralhna atangin 1,000 a tling thei bawk.
Chart No.1 hlui KPop Demon Hunters soundtrack chu 96,000 hralh lehin No.2-ah bawk a la awm a, chart No.1 hlui tho Morgan Wallen ‘I’m the Problem’ chu 83,000 hralh lehin No.3-ah bawk a la awm.
Tun kum nga chhunga Tame Impala full-length album hmasa ber ‘Deadbeat’ chu 70,000 hralhin No.4-ah a debut a, album tak tak hralh chu 37,000 niin, 33,000 chu streaming (on-demand official stream maktaduai 41.72) a ni a, hla mal hralhna chhiar tham a ni lo. ‘Deadbeat’ hi Tame Impala album top five-a lang thei pathumna a ni.
Chart No.1 hlui Sabrina Carpenter ‘Man’s Best Friend’ chu 43,000 hralh lehin No.5-ah bawk a la awm a, chart No.1 hlui tho Cardi B ‘Am I The Drama?’ chu 40,000 hralh lehin No.4 atangin No.6-ah a tawlh ve thung.
Olivia Dean ‘The Art of Loving’ chu 33,000 hralh lehin No.6 atangin No.7-ah a tawlh a, chart No.1 hlui SZA ‘SOS’ chu 31,000 hralh lehin No.8-ah bawk a la awm a, chart No.1 hlui Morgan Wallen ‘One Thing at a Time’ chu 30,000 hralh lehin No.10 atangin No.9-ah a insawn leh hret a, Alex Warren ‘You’ll Be Alright, Kid’ chu 30,000 hralh lehin No.9 atangin No.10-ah a tawlh ta bawk.