Newcastle in quarter-final an lut

October 29, Nilai zan khan English Carabao Cup last 16 khelh chhunzawm a ni a, champion lai Newcastle United chuan an mikhual Tottenham Hotspurs an hneh a, quarter-final an lut. Newcastle rual hian Arsenal leh Manchester City te pawhin quarter-final an lut ve bawk.
Champion lai Newcastle United hian St James Park-ah EPL club lian Tottenham an mikhual a, an mualah khingpui hautak neiin fiahna hautak an hmachhawn. Tottenham lakah an khelh tha viau a, si hnih fai ngawta hnehna changin champion nawn leh an tumna kawngah hma lam an pan zel.
Mualneitu Newcastle tan hian Fabian Schär chuan minute 24-naah hmahruaina goal a thun. He goal hian phurna leh inrintawkna sang zawk a pe a, an mualah an khel tha zui viau. Khel tha zui viau mah se chawlhlawk hmain goal dang an thun belh thei bik lova, 1-0 a hmahruai chungin chawlhlawk an hmang.
Chawlhlawk hnu lamah Magpies an khel tha chhunzawm a, goal dang an thun belh leh thuai. Forward palian leh huaisen Nick Woltemade chuan second half tan atanga minute nga hnu lekah an goal hnihna a thun a, an hmahruaina a tizau. Minute 50 chhunga goal hnih lut bak hi hun tawp thlengin goal dang a luh belh thei tawh lova, champion lai Newcastle United chuan an mualah 2-0 a hnehna changin quarter-final an lut zui ta a ni.
Arsenal pawh an chak
Nilai zana inkhel dangah EPL hmahruaitu Arsenal chuan Emirates Stadium-ah EPL club Brighton & Hove Albion an mikhual a, Newcastle United chakna ang zat tho; 2-0 a hnehna changin quarter-final an lut ve bawk.
Arsenal hi an mikhual Brighton lakah an khel tha a, hmuhnawm takin an inlan, An mualah khel tha viau mah se goal erawh an thun thei bik lawk lova, goal awm lovin chawlhlawk an hmang.
Chawlhlawk hmain goal lut awm thei lo mah se, chawlhlawk hnu lamah erawh goal a lut ta thuai thung. Gunners tan hian Ethan Nwaneri chuan minute 57-naah hmahruaina goal a thun. Rawlthar duhawm Nwaneri goal thun hnu hian Gunners an khel tha chhunzawm a, ball chang tam leh zualin mit an titlai leh zual. Khel tha tak Arsenal tak hian player pawimawh Bukayo Saka chuan minute 76-naah an goal hnihna thunin an chakna a nemnghet.
Saka goal thun hnuin goal dang a luh belh thei tawh lova, champion tura rinkai Arsenal chuan an mualah 2-0 a hnehna changin quarter-final an inhlangkai.
Brighton an hmachhawn tum hian Arsenal manager Mikel Arteta chuan rawlthar kum 15 leka upa Max Dowman bul a tantir a, Dowman hi Arsenal senior team tan bul tan thei naupang ber niin club record thar a siam. Rawlthar beiseiawm Dowman hian kum 14 mi lek a nih lai atangin Arsenal senior team training a zawm tawh a, senior team tan inlan zauh zauh tawh mah se nilai zan khan a vawi khat nan bul a tan.
Arsenal hi season kal mekah an chetha hle a, October thla chhungin vawi ruk ngawt inkhel an hmachhawn a, goal chhuah miah lovin hnehna an chang vek. English club zingah thla khat chhunga vawi ruk chak a, goal chhuah lo awm chhun niin record thar an siam.
City pawh an tlang
Newcastle leh Arsenal rual hian EPL club lian Manchester City pawhin last 16-ah hnehna an chang a, quarter-final an lut ve bawk. City hian championship club Swansea City an hmachhawn a, mikhual an nihna hmunah 3-1 in hnehna an chang.
City hian mikhual an nihna hmunah si an phurh hmasa zet a, mualneitu Swansea City tan Gonçalo Franco chuan minute 12-na lekah goal thunin City a barakhaih. Si phur hmasa mah se City tan Jérémy Doku, Omar Marmoush leh Rayan Cherki ten goal thunin an khingpuite an lehthal a, quarter-final an lut.
Quarter-final-a intum turte:
Quarter-final ah Arsenal leh Crystal Palace an intum dawn a, inkhel hmuhnawm tak a nih ngei a rinawm. Champion lai Newcastle United in EPL club Fulham an hmachhawn zui leh dawn bawk.
Chelsea in EPL club pumpelhin Leaegue One club Cardiff City an hmachhawn dawn a, Blues tan semi-final luh theihna kawng zau takin a inhawng. Manchester City leh Brentford an inhmachhawn ve bawk ang.