Telengana-a lorry leh bus insu-ah mi 20 thi

Telengana-a lorry leh bus insu-ah mi 20 thi
Telangana-a Ranga Reddy district-a Thawhtanni tuka rawra phur lorry leh sorkar hnuaia road transport corporation (RTC) bus insu-ah mi 20 vel an thi a, mi dang eng emaw zatin hliam an tuar bawk tih police-in an sawi.
Bus hi Tandur depot-a ding thin niin Hyderabad pana passenger 70 phura tlan a ni a, anmahni tawk zawnga kal lorry nen hian Mirzaguda khaw bulah an insu a ni.
Police chuan an insu na hle a, lorry-in a phurh rawra pawh bus chungah hian a baw nuai a, passenger tam tak a chhilh niin an sawi a. A hmutute chuan a chuangte mangang takin an au nasa hle a, tual chhung miten an pui hlawm tih an sawi.
Thi zingah hian lirthei khalhtute an tel ve ve a, hmeichhia eng emaw zat leh nausen thla 10 mi pawh a nu nen an thi tel tih police-in an sawi.
Emergency team-in JCB excavator pathum nen bus-a tangte lak chhuah hna hi an thawk a. Hliam tuarte chu Chevella Government Hospital-a lak an ni a, a na zual chu Hyderabad-ah phurh an ni a. Police thuneitute chuan hliam tuar na tak tak an awm avangin thi zat an la pun theih thu an sawi.
RTC bus-a chuang tam zawk hi zirlai leh pisa kai, kartawp hmang zo kir leh tur an ni.
Chetsualna thleng avang hian Hyderabad–Bijapur highway pawh khar a ni.
Telangana Chief Minister A Revanth Reddy-a chuan chetsualna thleng leh thi an awm pawi a tih thu a sawi a, Chief Secretary K Ramakrishna Rao leh Director General of Police B Shivadhar Reddy chu a rang thei ang bera chhanchhuah leh chhawmdawl hna thawk nghal turin a hriattir.
Hliam tuarte pawh enkawlna tha zawk an dawn theih nan a rang thei ang bera Hyderabad-a la turin a ti a. Minister leh thuneitu sang dangte pawh a hmun kala thil thlen dan enpui turin a ti.
Thuneitute chuan insutna thlen chhan hi an chhui nghal a, an hriat theih chinah chuan tlan chak lutuk vang a ni a lorry khalhtu hian a lirthei a thunun zo lo va, a su zawk niin an hria.