Rajasthan-a bus chesualah mi 15 thi

Rajasthan-a bus chesualah mi 15 thi
Rajasthan-a bus tê chi (minibus)-in trailer ding lai a sutah mi 15 an thi a, mi dang pathumin hliam an tuar bawk tih police-in an sawi.
An khawpui, Jaipur atanga km 400 dawna hla, Phalodi district-a Bharat Mala Highway-a Matoda khaw bulah he thil hi Pathianni tlai khan a thleng.
Police chuan thite hi Jodhpur-a Sursagar venga cheng, Bikaner-a Kolayat temple-a Kapil Muni Ashram-a tawngtaia kalte an ni tih an sawi.
Hliam tuarte hi Osian-ah enkawl hmasak phawt an nih hnuah Jodhpur-ah kalpui leh an ni a. Ruangte pawh Osian-ah hian dah an ni.
Chief Minister Bhajan Lal Sharma-a chuan he thil thleng hi pawi a tih thu leh thuneitute chu a tuartu chhungkuate puih theihna awm ang ang pe tura a tih thu a sawi a, hliam tuarte pawh a tha thei ang bera enkawl turin a ti bawk.
Chief minister hlui, Ashok Gehlot-a pawhin pawi a tih thu sawiin a tuartu chhungte a tawrhpui tak zet tih a sawi a, hliam tuarte pawh rang taka dam chhuak leh tura a duhsak thu X-ah a tar lang.
Prime Minister Narendra Modi-a chuan thi chhungte hnenah ralna Rs nuai 2 theuh pek an nih tur thu a puang a. Hliam tuarte tha taka dam chhuak leh tura a duhsak thu X-ah a tar lang.
Thla hmasa maiah khan Rajasthan-ah tho hian Jaisalmer-ah bus kangin mi 26 an thi a. Kangmei hi A/C-a electric kal dan fel lo atanga chhuak a ni a, bus-ah hian tlanchhuahna tur a awm lo va. Transport department-in an chhuinaah dan lova lirthei tihdanglam leh phal chin pela thil kalpui a awm nia sawiin hetiang ti tawh lo turin an ti.
Thla hmasa tawp lamah khan Uttar Pradesh-a Pilibhit-a cheng inhlawhfa 50 phur chuan Manoharpur-ah electric hruipui tawkin mi pahnih an thi a, mi dang 10-in hliam an tuar bawk.