Saudi Arabia-a bus chesualah Indian 42 thi

Saudi Arabia-a bus chesualah Indian 42 thi
Medina bula Umrah biakzina kalte phurtu bus leh diesel phur insuah mi 45 an kang hlum a, an zinga mi 42 vel hi Indian niin Saudi Arabia-a tual chhung chanchinbuten an tar lang.
Bus hi Mecca atanga Medina pan nia sawi niin Mufrihat bulah Thawhtanni zing dar 01.30 vela thleng a ni a. Indian passenger-te hi Hyderabad, Telangana-a mi niin Khaleej Times-in a tar lang.
Mecca-a an hun hman tur an hmang zo niin Medina lam pana an tlan laiin chetsualna hi an tawk a ni.
Gulf News chuan chetsualna thlen lai hian a chuang tam zawk hi an muhil a, an insut hnu lawka kang zui a nih avangin insasengna hun remchang an nei tlem hle niin a tar lang.
Thi zinga 11 vel hi hmeichhia niin naupang 10 an tel bawk a, an zat dik tak erawh hriat theih mai a la ni lo niin thuneituten an sawi thung.
Rescue team chuan bus hi a kang chhe hneh hle tih an sawi a, thite pawh tute nge an nih hriat mai harsa a nih thu an sawi a. Hetih lai hian mipa pakhat, Mohd Abdul Shoiab-a chu a dam chhuak nia sawi niin damdawi inah a awm a, a dinhmun dik tak erawh hriat theih a ni lo.
Telangana sorkar chuan Riyadh-a Indian Embassy an bepawh tawh a, Chief Minister Revanth Reddy-a’n New Delhi-a thuneitute pawh embassy thuneitute nena indawr zel turin a ngen bawk.
Sorkar hian Telengana atangin Resident Commissioner chu thite nihna chiang tak hriat tum turin a ti nghal a, state secretariat-ah control room a din tawh a, biak pawh theihna tur phone number pawh a tar lang tawh bawk.
Jeddah-a Indian embassy pawhin nileng zankhuaa biak theih tur control room leh a thlawhna biak theih tur helpline number a siam bawk.
Prime Minister Narendra Modi-a chuan Saudi bus chetsualnaa thihna thleng pawi a tih thu a sawi a. An chhungte a tawrhpui thu leh a tawngtaipui a, hliamte pawh dam leh thuai se a duh thu a sawi a. Riyadh-a embassy leh Jeddah-a consulate pawh bian Saudi Arabian thuneitute pawh a be tawh tih X-ah a tar lang.
Hyderabad MP Asaduddin Owaisi pawhin Riyadh-a Deputy Chief of Mission (DCM) Abu Mathen George biain an chanchin kimchang hriat theih dan tur a dap nghal tih a sawi.
Owaisi-a hian sorkar laipui chu Indian thite ruang lak hawna tur leh hliam tuarte enkawlna turah che chhuak thuai turin a ngen bawk.
Umrah biakzina kal zinga mi 16 hi Hyderabad-a agency pahnih, Al-Meena Hajj leh Umrah Travels kaltlanga zin nia hriat an ni a, anni hi an thi vek nia hriat a ni bawk.
Foreign Minister S Jaishankar-a pawhin Medinah-a chhiatna thlenga Indian an thi chuan a barakhaih hle tih a sawi a. Riyadh-a embassy leh Jeddah-a consulate-te chu a theih ang anga pui turin a chah a, thi chhungte a tawrhpui tak zet tih X-ah a tar lang.