Thawmhnaw dum inbelin Opposition MP rualte chuan March 27 khan Parliament atangin Vijay Chowk panin Adani issue leh Lok Sabha atanga Rahul Gandhi ban a nihna duhlohna lantirna a nei.
Lungawilohna lantir zingah hian Congress MP Sonia Gandhi leh party chief Mallikarjun Kharge te pawh an tel a, Parliament complex-a Mahatma Gandhi lim bulah pungkhawmin sorkar lakah an au rual zui bawk.
‘Satyamev Jayate’ banner tar leh placard ‘save democracy’ tih keng chungin MP te hian sit-in an neihna Vijay Chowk an pan khawm a ni.
“Eng tiangin nge kum rei lo te chhungin Adani hausak a pun thur thur theih? Foregn ram tlawhin tum engzah nge i zin a, industrialist engzah nge i hruai thin? PM hian tun thlengin Adani laka zawhna siam te a la chhang thei lo zel a ni,” tiin Kharge chuan Vijay Chowk a pukhawmnaah a sawi a.
“Adai issue-ah JPC kan duh a. Eng vangin nge sorkar hian a remtih theih loh? Enga ti nge JPC probe hi in hlauh em em…eng emaw dik lo a awm em ni,” tiin a sawi bawk.
Opposition te chuan Adani Group te chuan corporate fraud leh stock price manipulation an kalpui nasa tiin joint parliamentary committee chhui chian an phut a ni.
Kharge chuan Surat court-in kum 2019 criminal defamation case a thiam loh a chantir hnuah Rahul Gandhi MP atanga disqualify a nihna pawh a sawi lang a.
“Rahul Gandhi tihhmingchhiat in duh vang hrim hrimin a case pawh Kolar, Karnataka a ni chungin Gujarat ah a insawn a. Vawiin hi democracy tan black day a ni,” tiin a sawi a.
Kharge chuan Opposition MP tena thawmhnaw dum an hakna chhan chu Prime Minister chuan ‘democracy a tihhlum vang’ tiin a sawi.
Opposition protest a tel ve ngai miah lo Trinamool Congress te pawhin Thawhtannia lungawilohna lantira sit-in chu an zawm ve bawk.
A hmain opposition party MP hrang hrangte chuan Parliament complex-ah inhmuhkhawmna neiin Adani issue leh Rahul Gandhi disqualification chungchanga an chet zel dan tur sawihona an nei a ni.
Opposition ten thawmhnaw dum belin hma la
Get real time updates directly on you device, subscribe now.
Next Post