Israel-ah lungawilohna

Israel Prime Minister Benjamin Netanyahu chuan a defence minister a ban avangin mipui lungawilo sing tel te chu kawtthlerah pungkhawmin lungawilohna an lantir a.
Yoav Gallant chuan Netanyahu-an justice system thlak danglam a tum chu a duh loh thu a sawi chhuah avanga ban a ni a. Jerusalem khawpuiah police leh sipaite chuan Netanyahu chenna In bula pungkhawm mipuite hnawhdarh nan water cannon an hmang hial a ni.
Israel President Isaac Herzog pawhin sorkar chu reform a kalpui tum titawp rih tura ngenin, “Israel mipuite inlungrual nan legislative process titawp nghal turin ka ngen che a ni,” tiin a sawi a, “Israel mipui mit i chungah a fu thup,” tiin President Isaac Herzog chuan a sawi bawk.
He dan thar siam tum hi duhlohna a nasa hle a, reform siam turah sorkar chuan judge te ruatnaah thuneihna pumhlum a nei dawn a. Chu mai bakah office luah tlakloha ngaih court-in a hnawl thin te chu a harsa zual tawh dawn a, hei tak hi eiruk thubuai nei reng Benjamin Netanyahu-an inhumhim a tumna tia puh a ni.
Netanyahu chenna in kawta lungawilohna lantirnaah mi tam takin Israel flag an vai a, pots leh pan te an tihchhiat hnuah police forces te kalkanin Israel parliament Knesset ah an thleng zui a ni.
Defence minister ban tak Gallant hi sipai hlui niin kar tam tak chhung chu reservist te lak atanga dan siam thar tum an duhlohna ngaithla tawhtu a ni a. March thla tir khan Israel Air Force-a fighter pilot te chuan dan thar siam tur duh lovin training chhunzawm loh tur an lo ti tawh bawk a. Mahse, a hnuah an commander te nena inbiakna neiin an thulh leh thung.
Gallant hian he dan thar siam tum duh loh thu hi Inrinni kalta khan sawi chhuakin Israeli Defence Forces te chuan an duh lo hle a ti a. Khatih lai khan Netanyahu chu ram pawna a awm lai niin Gallant interview chu TV atanga thlirin amahah rinna a nghah tawh loh thu a sawi nghal a ni.
He dan thar hi parliament-in a pawm ngei tur a ni a, Gallant leh Natnayahu te hi Likud party ve ve niin Gallant hian thlawptu a nei nual nia ngaih a ni bawk a, a thente erawhin ban a ni chu tha an ti thung.
Israel opposition leader Yair Lapid chuan Gallant ban chu sorkar tan tlakhniam rawih rawihna tiin a sawi a. “Netanyahu hian Gallant a ban thei a, mahse, Israel mipui lungawi lote chu a ban thei dawn lo,” tiin Lapid chuan a sawi.
White House pawhin thuchhuah siamin US chuan thil awm dan a ngaihven takzet a ti a, “President leh Prime Minister Netanyahu tena tun hnaia sawi dunna an neih angin, democratic values te chu US-Israel inlaichinnaa ngaih pawimawh a ni ber a, a ni zui zel ang,” tiin a sawi a. Democratic system a inthlak danglamna siam dawnin a tam thei ang ber duhdana kal zel tur a ni, a ti bawk a. Israel leader te chuan inremna an neih theih ngei kan beisei, a ti bawk.