Nigeria biak in beihnaah pahnih thi, pastor telin tam tak hruai bo

Nigeria biak in beihnaah pahnih thi, pastor telin tam tak hruai bo
Boarding sikula hmeichhe zirlai 25 ruk bo an nih hnu lawkah Nigeria-ah mi sualten biak in beiin mi pahnih vel an thah a, pastor leh inkhawm thenkhat an ru leh tih police leh thil thleng hmututen Nilaini khan an sawi.
US President Donald Trump-a’n Kristiante tihduhdah thina puha sipai tirh mai a duh thu a sawi hnua ram lailia Kwara state-a Eruku khuaa Thawhlehnia inkhawm lai beihna thleng hian sorkar a nawr na zual mek zel.
President Bola Tinubu-a chuan thil thleng avang hian South Africa leh Angola-a G20 leh AU-EU summit-a tel tura a zin chhuah hun a sawn a, Kwara-ah hian venhim hna thawktu tam zawk tira chhui chhuak ngei turin a ti tih a pisa chuan a puang.
President hian sikul naupang ruk bote pawh zawn chhuah an nih theih nan ‘a tih theih ang zawng zawng’ ti turin a ti bawk niin a thupuangtu, Bayo Onanuga chuan a sawi.
Nigeria-ah hmarchhakah Islamist hel an che nasain mi ruk leh thah an tam a, hmarthlangah mi sual pawl (gang) che nasain ram lailia Muslim ran vulh leh Kristian lo neitute an intibuai nasa bawk.
Sorkar chuan US-in ‘ngaihven ngai ram’ tia a sawi chu thil hriat sual palh awm vang nia sawiin venhimna thilah derthawnna awm mah se sakhaw zalenna vawng turin hma lak reng a nih thu a sawi.
Thawhlehnia thil thleng hi tlai dar 06:00 velah niin police nen pawh an inkap a, a hnuah bial in chhungah mi pakhat na taka kah leh a bul ramhnuaia mi dang hmuh a nih thu Kwara police thupuangtu, Adetoun Ejire-Adeyemi-a chuan a sawi.
Thil thleng hmutute chuan biak ina inkhawm thin mi pathum vel an thih thu an sawi thung.
“Pastor telin inkhawmte chu an din hual a, ram hnuai lamah an hruai ta a ni,” tiin parishioner Joseph Bitrus-a’n Reuters a hrilh a, a zat erawh a sawi lo.
Tual chhung chanchinbute chuan video an tihchhuahah Christ Apostolic Church-a inkhawm lai hi silaia tihbuai an ni a. Ralthuam kengte lutin silai hmeh puah pahin inkhawmte thil an laksak tih a lang.
Thuneitute chuan hmarthlang lam, Kebbi state-a Thawhtannia mi sualten Muslim Government Girls Comprehensive Secondary School atanga zirlai an rukte chanchin an la hre lo bawk.