Russia-in Ukraine-a chenna a kahah naupang telin mi 25 thi

Russia-in Ukraine-a chenna a kahah naupang telin mi 25 thi
Russian missile leh drone-in Ukraine khawthlang lam, Ternopil khawpuia chenna in lian pahnih a fuhah naupang pathum telin mi 25 vel an thi niin thuneituten an sawi.
Nilaini tuk hma taka beihnaah hian hliam tuar mi 73 an awm a, an zinga 15 hi hmeichhia an ni a. Tun hi Moscow-in February, 2022 atanga Ukraine a rûn hnua helai ram bial a beih nat ber tum a ni.
Ukraine-a air force chuan Russian X-101 cruise missile-ten mi chenna flat a fuh niin an sawi.
An thenawma Lviv leh Ivano-Frankivsk region-te pawh kah a ni a, drone hmangin hmarchhaka Kharkiv khawpui kahnaah mi 30 chuangin hliam an tuar bawk a. Online-a thlalak thehdarhah chuan in leh car kangte pawh a lang.
Ukrainian air force chuan drone 476 zinga 442 leh missile 48-a 41 an kap thla tih an sawi a, khawthlang ramten Kyiv hnena a pek F-16 leh Mirage 2000 indo thlawhna hmangin missile 10 an kap thla tih an sawi.
Ternopil hi Kyiv aia Polish ramri hnaih zawka awm niin nasa taka beihna an tawng tam ve lo va. Social media-a video darhah chuan van sangah missile a thlawk lai leh lei lama invenna hmanrua lo bei let laite pawh a lang.
Ukrainian President Volodymyr Zelensky-a’n video a tihchhuahah chuan chenna in lian tak hlawm khat chu a chhe nasa hle a. Interior Minister Ihor Klymenko-a chuan chhawng thumna leh kuana inkar a chhia tih a sawi bawk.
Zelensky-a hian a tuartu tam tak chu in chhe karah hian an tang niin a sawi a. Tukverh atangin meikhu a chhuak nasa a, a bul velah pawh kang tenau a awm nual bawk.
Ukraine khawthlang lamah hian energy hmun, inkalpawhna leh vantlang mamawh thil ang chi a chhe nasa hle a. Ivano-Frankivsk region-ah power pek chhuahna hmunpui beih leh niin mi pathum hliamin pahnih chu naupang an ni a. Lviv region hotu pawhin an energy hmun a chhiat thu a sawi bawk.
Russia hian tun hnaiah Ukraine-a energy grid a bei nasa a, electric pek pawh sem rual niin beihna thar an tawh reng avangin energy ministry chuan power awm lo a tam lehzual dawn niin a sawi.
Russiaa defence ministry chuan Ukraine-in vantlang an kah chhan let nan hmun hla kap thei ralthuam hmangin Ukraine-a ‘military-industrial complex leh energy hmun’ an bei tih an sawi.
Ukrainian sipaite chuan Thawhlehni khan US-in a pek, Atacms missile hmangin Russia chhunga an sipaite an kap tih an lo sawi tawh a. Russian defence ministry pawhin Kyiv hian missile pali hmangin chhim lama Voronezh khawpui an kap a; mahse, a vaiin a tum a fuh hmain an lo kap thla tih an sawi thung a ni.