Ukraine indona titawp tura inbiaknain hma lam pan, hmabak la tam

Russia leh Ukraine indo mek tihtawp tuma Geneva-a US leh Ukraine inbiakna chuan ‘hma lam a pan’ tih an sawi ve ve a, hmabak erawh a la awm.
Moscow leh Kyiv inkara ram insem dan tura ngaihdan inang lo awmah eng angin nge thil kalpui tum a nih leh Ukraine himna tura hmalak dan tur sawi chian a la awm lo.
Ukrainian President Volodymyr Zelensky-a chuan ‘rahbi pawimawh tak’ pen a ni tih a sawi rualin ‘an harsatna lian ber’ chu Vladimir Putin-a’n an lova Russian-ten Ukraine khawchhak lam an luah neih a tum chu a nih thu a sawi.
“Hei hi chuan ram bil nihna leh rorel hrang ram nihna a tichhe dawn a ni,” a ti a, hei hi Moscow-in tharuma ram a chhuh neihsak an tum a sawina a ni.
President Donald Trump-a chuan social media-ah ‘thil lawmawm a thleng dawn’ niin a tar lang a, chutihrual chuan, “I hmuh phawt loh chuan lo awih ngawt suh,” a ti bawk.
Geneva-a inbiaknaah hian Russian aiawh an tel lo va, Kremlin chuan eng nge an sawi tih pawh an hriatpui rih lo tih a sawi.
Point 28 awm muanna a awm theih nana US leh Russian thuneituten ruahmanna an neih hi kar hmasa khan Ukraine hrilh an ni a. Tam tak chu Moscow-in rei tak atanga a lo phut tawh thilte a ni a, Kyiv leh European an thawhpuiten an duh lo ve thung.
Trump-a chuan Ukraine hi Ningani hmaa an rawtna pawm turin a ti a, a nih loh chuan US-in a puihna tam tak an tihtawp dawn thu a sawi a, hei vang hian Europe leh Ukraine leh US thuneitute chu sawihovin an thukhawm nghal a ni.
Pathianni zan khan US Secretary of State Marco Rubio chuan an indawrnaah ‘hmasawnna lian tak’ a awm thu a sawi a, a tawp an thlen thuai a ring tih a sawi bawk.
European hruaitu thenkhat erawh chu an fimkhur a. “Muanna hi a hnai em tih ka sawi ngam lo,” tiin Polish Prime Minister Donald Tusk-a’n a sawi a. German Chancellor Friedrich Merz-a pawhin inbiakna chu ‘rei leh kalpui tam tak awm’ nia sawiin tun karah an tihfel hman a ring lo.
Kum 2022 atanga Ukraine an rûn hnuah Russia hian Ukrainian-te chu Donbas region khawchhak lam atanga insawn chhuah vek an duh a. Kyiv leh an European thawhpuite chuan an duh lo va, Zelensky-a pohei chuan Donbas an chhuahsan chuan an ram chu Russian-ten nakina an beih nan a remchang zual sawt dawn niin a sawi.