Sawhthing an hralh that avanga sawrkara sum chhunglet an awm – K Sapdanga

– K Sapdanga
Sawhthing avangin chhungkaw tam tak an lawm mek a. Khaw thenkhat chuan an khaw chanchina chhinchhiah tlak bik sum an lakluh avangin sawrkarah lawmthu sawina sum an chhunglet hial tawh tih minister K Sapdanga chuan a sawi.
Lai Autonomous District Council inthlanpui atana ZPM candidate ho tana campaign-a thawkchhuak K Sapdanga chuan, LADC-ah sawrkar nghelnghet ding thei loin Lai mipui hrehawm tih khawpin kan aiawha kan thlanchhuahte sawrkar-na fawng chelh tumin an thle tawn thin a, hetiang hian hmasawnna hnathawh tur hmachhawpin a tawrh phah a, chu’ng chu mipuiin an tuar thin tih a sawi.
ZPM party-in state-ah sawrkar nghelnghet tak a siam mek a, LADC-ah pawh sawrkar nghet tak siam tumin an inzuar tih sawiin, “District Council chakna ringawt chuan hnathawh a theih loh zia hrechiangtu in ni a, state sawrkar thlawh khumin hma a lak tak tak theih loh. State sawrkar nena thawk dun tur, hma la dun thei tur mipuiin kan thlan chhuah a pawimawh a ni,” a ti.
Mizorama kuthnathawktu tam zawkin lo an neih paha an thlai chin ve theih sawhthing avangin chhungkaw tam tak an lawm mek, tiin, khaw thenkhat chuan an khaw chanchina chhinchhiah tlak bik sum an lakluh avangin sawrkarah lawmthu sawina sum an chhunglet hial tawh tih minister hian a sawi a ni.
ZPM sawrkarin an flagship programe thlai thar lei chu an sawrkar kum khatna atangin an kalpui tih sawiin, “Inthlan dawn hnaiha flagship programe kalpui chauh thin party dangte chuan a min ti ngei ang. Kuthnathawktute hamthatna tur a nih phawt chuan kan hotupa Pu Lalduhoma ho hian kan lo a ngam zel ange,” a ti.
Khaw hla tak takten damdawi in atanga ruang phurh chungchanga harsatna an tawh chu ZPM sawrkarin mipui tan awlsam takin a buaipui a, damloh nikhuaa kan lungngaihna ber thin chu sum leh pai harsatna vang a ni, tiin, chu harsatna sukiang tur chuan Universal Healthcare SCheme hmangin tunah mi tam tak an inenkawl mek tih a sawi bawk.