MBBA Cup 2025 Quarter Finals A Hmuhnawm Dawn!
MSSC Golden Jubilee MBBA Cup 2025 chu November ni 17 atang khan khelh tan chuan a hmarbawk lam a hnaih tan a, vawiin hian inkhel hmuhnawm bik chhawpchhuahin a awm dawn tih a sawi ngam. Dan pangai angin inkhel hi MBBA Youtube channel-ah live a tihchhuah a ni leh dawn.
Tun tum inelna ah hian MBBA hnuaia MSL Club 8 zing atangin Tuikual South Basketball Club leh Mission Veng Hotshots chu Quarter finals thleng pha lovin inelna hi an mangtha a tul – anni club pahnih tan hian thla hnih hnu maia MSL khelh turah an insawrbing nasat zual a tul ang.
Inbuatsaihna nei tha, MBBA Season Opening 2025 champion lai Khatla TBL tan hian OPD Venghlui BC hian harsatna khirhkhan an thlen a rinawm loh; Zarkawt BCA hi an tawlh thlu sual fe a nih loh chuan Kicksology tan an la hrawl hret! Zemabawk BC hian club lian leh champion kawngkapui kik hawng ngam an nih zia tun inelna ah hian an star player pahnih Ropuia leh Thianga ten an phochhuak tawh a, Saron BC tan hian an boss Marc Sailo kaihhruaina hnuaiah hian ‘champion trophy nena lendun thiam tak maw?’ Match hnuhnung bera Chanmari BC leh Chhinga Veng BC inkhel tur hi en a manhla ang.
Hoops Mania Time Out
Kicksology Bihchianna
Quarter finals-ah hian mak tak maiin tun season-a champion trophy pathum zet chawi tawh, Tuikual South Kicksology club chu an inhlangkai a, an season hman fuh ber tum tawng chhunzawmin Mizoram basketball history tingaihnawm zual turin hniak mawm tak an hnutchhiah leh ta.
He club Kicksology hian ADBBA Season Opening tournament 2025 chu duhthusama thain an nam hawng a, champion trophy an chawi – he inelna ah hian division 1 club chungah an leng.
MBBA buatsaih Inter District tournament Champhai lamah khel chhunzawmin Aizawl aiawhin an fehchhuak a, an champion leh! Tun hnai maia ADBBA Cup khelh zawh takah khan division 2 huangah King Kicksology an nihna nemnghet chhunzawm lehin, an club chanchin leh champion nomawi hi a inzawm tlat! He club hian quarter finals-ah hian Zarkawt BCA chu pool match lama an hneh loh hnuin an tum leh dawn a, an tan fiahna hautak paltlang tur a awm – Zarkawt BCA hi an hneh ta lo a nih pawhin kum 2023 a din Kicksology tan hian lungmuang takin masi hla sa in kum tha dang an urlawk a nih pawhin an phu thlawt – an inbuatsaihna tha leh team boruak nung tak hi an boss Ahruaia hian a tlangval mit a del hnu hian hmu fiah chhunzawmin veng him zel tak ang maw…