Anti Defection Law hi ADC-in rel theih a ni lo – TBC Lalvenchhunga

Anti Defection Law hi
ADC-in rel theih a ni lo
– TBC Lalvenchhunga
Leader of opposition Lalchhandama Ralte in LADC-ah MNF a sawrkar chuan District Council-a rorelna nghet a awm theihnan ‘Anti-Defection Law’ an hman tur thu a sawi chu District Council thuneihna a ni lo a, state sorkar kut a ni a, Parliament-a India danpui khawih danglam ngai a ni tih ZPM MLA TBC Lalvenchhunga chuan a sawi.
Lai Autonomous District Council inthlanpui atana campaign ZPM PAC member TBC Lalvenchhunga chuan, Inrinni zana Lawngtlaia thu a sawinaah ZPM sawrkarin Autonomous District Council (ADC) pathum budget zaa 20-in a tipung niin a sawi a. ADC pathum tan a hmaa cheng vaibelchhe 500 bawr dah thin chu ZPM sawrkar hnuaiah zaa 20-a tipungin, budget hi cheng vaibelchhe 612 a kai pha tih a sawi. LADC pawhin leiba cheng vbch. 5000 chuang a neih rulhna tur an ngaihtuah a ngai, tiin, mipui chu state sawrkar thawhpui nei thei tur an thlan thiam a tul tih a sawi a ni.
Leader of opposition-in a campaign thusawiah District Council-a rorelna nghet a awm theihnan Anti-Defection Law an hman tur thu a sawi chungchang chu chhangin, “Hei hi District Council subject a ni loa, state sawrkar kut a la ni lo cheu. Parliament-a India danpui khawih danglam ngai a ni a, hei hi a hre lo em ni” tiin TBC Lalvenchhunga hian a sawi.
Lairam a dam lo, tiin, budget pharh hleithei loa an awm chhan zir turin a chah a. Larsap-in chhuanlam siamin a remtihpui miau loh chu tu thiam loh nge tih a zawt. An aiawha an thlanten an tan nge ro an rela anmahni tan tih chhut turin a zawt bawk.
“Rem lo chung chunga ADC mipui tana thahnemngaihna avangin cheng vbch. 146 chuang pe tawhtu he sawrkar hi nge, chiri taka candidate pawh nei kim thei lo in duh? Thawhpui theih tur hi thlang ang u,” a ti a. LADC sawrkarin tunah cheng vbch. 21 chiah a nei tawh a, vbch. 146-in kum chanve a daih loh chuan vbch. 21 chuan a daih lo hle dawn tih ZPM PAC member hian a sawi a ni.