Huaisen chawimawina dawngtu hlan

Huaisen chawimawina dawngtu hlan
Sawrkar laipui Ministry of Home Affairs-in mi huaisen chawimawina ‘Jeeven Raksha Padak Award 2025’ a hlan zingah Mizoram atangin Champhai district Tlangsam khaw mi Laltlanzova a tel a. Thawhlehni khan Home minister K Sapdanga’n sawrkar laipui aiawhin Aizawlah a hlan. Award hian tangkapui, citation leh sumfai cheng nuai khat a keng.
Jeeven Raksha Padak Award hi chhiatna leh chetsualna kara huaisen taka mi nunna chhanchhuaktute hnena hlan thin a ni a. Laltlanzova hian 2024 September 7 khan Khawzawl district Dulte khawdai, Dilmawiah tui tla an awm tih a hriat veleh chhan tumin tuiah a zuang lut nghal a; Dilmawi hi feet 50-a thuk niin, theihtawpa a beih hnuah tui tla hi la chhuakin, a nunna a chhanhim a ni. He a thiltih avang hian award dawng tura thlan a ni.
Home minister chuan Mizoten kan ngaihhlut em em chu mi huaisen an ni, tiin, pi leh pute hunlai atang tawha kan thupui ber pakhat pawh ‘thian chhan thih ngam’ tih a ni thin a; tunlai khawvelah hetianga midangte nunna chhanna atana mahni nunna thap ngam, mi huaisen kan nei leh, India ram pum huap chawimawina dawng thei kan nei chu a lawmawmin a ropui takzet, tiin a sawi. Thangthar lo awm zel turte tan entawntlak tak a ni tih sawiin, thalaiten thian chhan thih ngam rilru chawinung thar leh turin a sawm tih a sawi a ni.
8 Jeevan Raksha Padak Award hi India rama civil mite hnena lawmman pek thin, midangte nunna chhanhimna atana thiltih chawimawi phu, mahni inphat chunga huaisenna lantirtute hnena hlan thin a ni.
8 1961 September 30 atanga bul tan niin, vawiin thlengin India sawrkarin a kalpui zel a ni.
8 He award hi category thum – (i) Sarvottam Jeevan Raksha Padak (category sang ber), Uttam Jeevan Raksha Padak leh Jeevan Raksha Padak a then a ni a. Midang chhantu in chet a lakna a hlauhawm dan azir leh chhiatna/ vanduaina thlen nasat dan atangin award dawng tur hi then hran thin a ni.