Hunpui laiin gas a harsat loh beisei Ruai siamna atan commercial bur

Hunpui thleng turah eirawngbawlna gas-a harsatna a awm lohnan sawrkar leh IOC Limited chuan hma an la tih Supply minister B Lalchhanzova chuan a sawi a. Ruai siam atana kohhran hoin commercial bur a tam thei ang hmang se an duh tih a sawi. FCS&CA minister chuan hunpui lo thleng tur inbuatsaihna atan IOCL chuan December 13 hma ngeiin LPG booking backlog /pending clear vek turin distributor ho a hriattir tawh. Hemi hnu hi chuan booking nghah chhung hi ni hnih aia rei an rial tur a ni lo tih a sawi. Kawng chhia in that lam a pan zel a, eirawngbawlna gas lakluhah harsatna a awm loh an beisei tih a sawi a ni.
“Distributor hma la tha lo chungah IOCL-in action a la zel dawn a, a tul angin department pawhin enzuiin hma a la dawn,” a ti.
Krismas leh kumthar ruai siamna atan kohhran-in LPG domestic bur an hman thin chu, dan phal loh thil a nih bawk avangin a tam thei ang commercial bur hmang turin an ngen tih a sawi a. Hemi tur hian distributor ho pawh inbuatsaih se an duh tih a sawi.
LPG home delivery-ah Aizawl Municipal huamchin, Serchhip, Hnahthial town, Khawzawl leh Mamit khaw chhung bikah zaah zaa kalpui a ni tawh a, 2026 March hian district headquarters zawng zawngah 100% a kalpui kim tum a ni tih FCS&CA minister hian a sawi. 2026 September-ah chuan notified town hoah gas distributor awmna khuaah chuan 100% home delivery tih tum a ni tih a sawi a. Home delivery kalpui tawhnaah hian point delivery kalpui phal a ni tawh lo tih a sawi bawk.
Gas bur tihchingpen awm thin tih rehna atan distributor ho chu kudam-a thlen hmasa vek a, buk a tling ngei tih finfiah hmasa turin an ti a. Hemi ang hian rokhawlhna nei pahnih khat tih lohah chuan kalpui a ni tawh tih a sawi.
Buk tling lo an lalut a, kudam atanga an semchhuak a nih chuan, a tlin lohna kha distributor-in a chawi tur a ni a, buk tling lo lakluh an duh dawn lo tih B Lalchhanzova hian a sawi a ni.