India bungraw thawn chhuah 15% velin pung

India bungraw thawn chhuah 15% velin pung
India-in November thlaa ram pawna bungrua a thawn chhuah chu 15% vela pungin $ tluklehdingawn 36 man a thawn chhuak.
Nikum November thlaah khan $ tluklehdingawn 32 man thawn chhuakin US-in an rama Indian bungrua a lak luhah chhiah sang tak a laksak mek laiin a pung zawngin a kal hret tho a ni.
India hian November thlaa a thawn chhuah a pun lai hian a lak luh erawh a tlem zawk hret a. October thlaah khan rangkachak leh silver a lak luh tam avangin $ tluklehdingawn 41.68 man zet bungrua a la lut a, a pung viau tawh thung.
US-in Indian bungrua a lak luhah chhiah 50% a laksak mek laiin India hi sumdawnnaah a hmasawn zawngin a kal a, hei hi sumdawnna bungrua chi hrang a ngam tak vang niin mi thiamte chuan an sawi a. US-a a thawn luh bik erawh September thla khan a hma kum aia 12%-a thawn tlemin $ tluklehdingawn 5.47 man a thawn a. October-ah poawh 8.6%-a tlahniamin $ tluklehdingawn 6.31 man a thawn.
Hetih lai hian China, Spain, Europe, United Arab Emirates (UAE) leh Russia-ah a thawn chhuah a pung ve thung a, hei hi India-in US-a a thawn tlem hnawh khatna a ni deuh ber a. Sorkarin a chhinchhiah dan chuan China-ah hian a thawn tam zual a, April atang khan a pung zual a, September-ah 33% leh October-ah 42% laiin a pung a ni.
China hi US-in Indian bungruaa chhiah sang a lak hnua Delhi-in bungrua a thawn lut zat a pun nasatna ber dawt niin Spain chu pung nasa ber a ni.
China-ah hian October thla khan $ tluklehdingawn 1.63 man thawnin nikm October khan $ tluklehdingawn 1.14-a thawn aiin a pung a, 42.35%-in a pung a. Spain-ah pawh nikum October aiin 43.43%-a thawn tam zawkin $ maktaduai 549.26 man a thawn.
India-in bungrua a thawn tam ber hi electronic bungrua leh tui lam sa a ni a. Electronic bungrua hi 2025-26 thla sarih chhungin a thawn chhuah 37.9% chuanga pungin $ tluklehdingawn 26.29 man a thawn chhuak a, a hma kum tun ang hunah $ tluklehdingawn 19.07 man a thawn chhuak thung.
Tuipui sa pawh 11.66%-in a thawn chhuah pungin $ tluklehdingawn 4.69 man a thawn a, 2024-25 April leh Ovtober inkarah kha chuan $ tlukledingawn 4.20 man a thawn thung.
Bungraw thawn chhuaktute chuan bungraw chi hrang thawn a tam tak avang hian European Union, Vietnam, China leh Russia nen indawrna a tam phah nia sawi a ni.