Tourism hmasawnna atan Assam leh Mizoram-in thawh dun an tum

Tourism hmasawnna atan Assam
leh Mizoram-in thawh dun an tum
Tourism minister Lalnghinglova Hmar chuan Inrinni khan Guwahati-ah Assam Tourism minister Ranjeet Kumar Dass a kawm a, tourism hmasawnna turin thawh dun an remti. Hun remchang hmasaah thawh dunna thuthlung ziah tum a ni.
Mizoram-in tunhnaiah tourist a nei tam a, heng khualzin zinga a tam ber hi Assam state atanga lo zin an nih avangin Assam sawrkar nena tourism hmasawnna kawnga thawh dun a tul tih Lalnghinglova Hmar hian a sawi a. Ranjeet Kumar Dass hian hei hi tha tiin, official-te nen an sawiho nghal a ni.
Assam minister chuan, Mizoram chu an tan state hrang a ni loa, tunhmaa state khata chengho vek kan ni, tiin, “Mizoram tlawh hi Assam mite hian an chak a, rel a awm tawh bawk nen mi thahnem zawk an lo kal zel kan beisei,” a ti.
Mizoram Tourism minister chuan, India ramah state te leh mipui tlemna kan ni a, chutihlaiin khualzinin an tlawh duh leh ngainat state nih tumin an inbuatsaih mek tih sawiin, “He state hian a mamawh chu thawhpui tha a ni a, hla tak amite nena thawhho aiin Assam nena thawh dun hian tourism hmasawnna tura rah tha a chhuah kan ring tlat a ni,” a ti.
Assam tourism hunpui buatsaihah Mizoram tourism chawilarna tur thlalak leh video a remchan anga tilar ve thin tura ngenna a thlen chu tihhlawhtlin an tum tur thu an hrilh a ni.
He inkawmnaa tel ve Assam Tourism Development Corporation managing director Kumar Padmapani Bora chuan Mizorama tour operator-te tan Guwahati lamah workshop an buatsaih thei tih a sawi a. Mizoram-in ATDC kaltlanga tourism lama puih a tulnaah an inhawng reng tih a sawi a ni.